airplanebooksbriefcase business cogs cross election entertainment fish house law lockmedicalpeopleselfservices socialtax

Sisimiuni Majuartaateqarfimmik aqutsisoq

Qeqqata Kommunia akisussaaffeqartumik tunniusimasumillu majuartaateqarfimmi Sisimiuni ingerlatsisussamik aqutsisussarsiorpoq.
Qinnuteqarfissaq kingulleq:
18. oktober 2019
Sumiiffik/Pisortaqarfik:
Sisimiut
Sivisussuseq:
Tamakkiisoq
Atorfininnermi ulloq:
Atorfiniffissaq piaarnerpaamik imaluunniit isumaqatigiissuteqarnikkut
Akissarsiat:
Isumaqatigiissutit atuuttut naapertorlugit

Suliassaqarfik naatsumik 

Majuartaateqarfik Sisimiut Qeqqata Kommuniani Teknikkeqarnermut Avatangiisinullu immikkoortortaqarfiani akisussaaffigineqarpoq.  Ulluinnarni suliassaq, Sisimiuni majuartaateqarfimmik ingerlatsineq. Sisimiuni majuartaateqarfiup ataaniipput ujakkaartartunut centeri, majuartaateqarfeeraq illoqarfimmut qanittoq – Arnap mikisup inussuliaa taavalu sangusaartarfik anginerusoq Sisimiut kangianiittoq - Alanngorsuaq. Suliassanut atatillugu, imeqarfiup killeqarfiani assartuussinermut ingerlavissiamik pilersitsineq aserfallatsaaliinerlu kiisalu imeqarfiup killeqarfiani avatangiisitisut assigfiinngitsutigut nakkutilliineq isumagineqassapput. Ukioq sisorarfiusoq novemberimit maajip missaanut ingerlasarpoq.  Sisorarfiup matoqqanerani Teknikkeqarnermut Avatangiisinullu immikkoortortaqarfiup ataani, kommunip sannaveqarfiani formandimit ataqatigiissaarneqartuni, ingerlatsinermut aserfallatsaaliinermullu suliaqartarnermut peqataassaatit. Sisimiut nunarsuarmi ujakkaarnermik sakkortunerpaamik ingerlatsiviuvoq – Arctic Circle Race, innuttaasunit nunarsuarmiillu tamanit takornarissanik ornigarfigineqartarluni. Qeqqata Kommunia – Sisimiut, Arctic Circle Race-mi aqutsisut peqatigalugit, unammisitsinermut atatillugu illinernik assartuinernillu qulakkeerisarpoq.

Majuartaateqarfimmik aqutsisup aammattaaq qulakkiissavaa/akisussaaffigissavaa Sisimiut Kangerlussuullu akornanni Qeqqata Kommunianit takornarissanut illuaqqat pigineqartunik nakkutilliineq, iluarsartuussineq eqqagassalerinerlu.

Sisorarfiup matoqqanerani suliassat maannakkut nassuiaasiorneqaleruttorput, atorfinitsitsinnginnermilu ersarissarneqarumaarlutik. Tunngaviusumik majuartaateqarfimmi aqutsisoq, Kommunip sannaviutaani formandimit ulluinnarni ingerlatsinermut aqunneqartumut suleqataassaaq. Tassani sunngiffimmi neqeroorutinik eqqiluisaartitsineq, ingerlatsineq aserfallatsaaliinerlu ukkatarineqarput, ilaatigut arsaattarfiit, silami timimik sungiusartarfiit, pinnguartarfiit, taamatullu naluttarfiup ulluinnarni ingerlanneqarnerata aaqqissuussaanera ilanngussinnalluni. Majuartaateqarfimmi aqutsisoq Teknikkeqarnermut Avatangiisinullu immikkoortortaqarfiup ataani attaveqaqatigiinnermik suliniutinut assigiinngitsunut suleqataasutut peqataassaattaaq.

Majuartaateqarfimmi aqutsisoq Kommunip sannaviani formandimik qaninnertut attaveqassaatit, sisorarfiup nalaani tassannga sulisussannik atugassinneqassallutit.

Suliarisartagassatit aamma Akissarsiat atorfininnermilu atugassarititaasut 

Ukiukkut ingerlatsinermi ilaatigut suliassat makkuninnga imaqarput:

· Sisorarfiup aallartinnginnerani Majuartaateqarfimmi pissutsit pitsaasuunissaanik qulakkeerineq.

· Sulisunik pingasunik-sisamanik majuartaateqarfimmut attuumassuteqartunik aqutsineq.

· Majuartaateqarfiup ammarneqannginnerani illiniliat suliarilluarneqarsimanissaanik qulakkeerineq.

· Majuartaatip atortullu tassunga attuumassuteqartut ajoquteqanngitsumik ingerlanissaat qulakkiissallugu.

· Qamussuit, qamuteralaat, majuartaatit atortullu allat eqqortumik ingerlanneqarnissaanik aserfallatsaalinissaanillu qulakkeerineq.

· Kiffartuussinermik kingoraartissanullu tunngatillugu pilersuisunut attaveqaatinik qulakkeerineq.

·Imeqarfiup killeqarfia aqqusaarlugu assartuussinermik ingerlavissiap piareersarsimanissaanik kiisalu eqqortumik nalunaarsorsimanissaanik qulakkeerineq.

· Kommunip sannaviani formandi peqatigalugu sulisut suliffissaat pilersaarusiorlugit.

· ACR-ip ingerlanneqarnerani kommunip pisussaaffiinut atatillugu, ACR-ip ingerlanneqarnissaa sioqqullugu, ingerlanneqarnerani kingornalu ataqatigiissaarisuumeq.

· Imeqarfiup killeqarfiani nakkutilliineq, inatsisillu qaqugukkulluunniit atuuttut malinneqarnissaanik qulakkeerineq.

· Sisorartartut klubbiinik majuartaammillu nalinginnaasumik atuisunut sinniisunik ataavartumik oqaloqatiginnittarneq.

·Unammisoqarnerni, matumani illoqarfiit akornganni pissartanngorniunnerit, GM allallu ingerlanneqarnissaanut pissutsit pitsaanerpaaffianiinnissaanik qulakkeerineq.

· Majuartaateqarfimmi sisorartarfiup ukiumoortumik eqqortumik matuneqarnissaanik qulakkeerineq.

·Sisimiut Kangerlussuullu akornanni takornarissanut illuaqqat Qeqqata Kommunianit pigineqartunik nakkutilliinerup, iluarsartuussinerup eqqagassalerinerullu qulakkeernissaa.

Naatsorsuutigaarput

Suliassat allaffissornerummata suliaqarfiullutillu, taamaattumik kissaatitut piumasaqaataapput:

  • Sisorarnermi timersuutinut – ujakkaarneq, snowboard-erneq sangusaarneq allallu ilisimasaqarluarfigigitit soqutigisarilluarlugillu.
  • Majuartaateqarfimmik ingerlatsinissamut soqutigisaqartuusutit ilisimasaqarlutillu.
  • Sulisunik aqutsinermik misilittagaqartutit.
  • Assassornermik – mekanikeritut, innaallagisserisutut, sanasutut assingusumilluunniit ilinniagaqartuusutit.
  • Atuisunik suleqatinillu oqaloqatiginissinnaassuseqartutit.
  • Suleqateqallaqqissuusutit kiisalu arlalinnik ataatsikkut suliaqallaqqissuullutit.
  • Ingammik ukiuuneraani unittoornermi allanilu piareersimasassasutit.
  • Oqaatsitigut piginnaasaqarluartutit, matumani kalaallisut qallunaatullu
  • Sisorarfiup nalaani sivisuumik allanngorartumillu sulisinnaanissat ammaffigissagit, pingaartumik Arctic Circle Race-mik ingerlatsinermi nunatsinnilu sisorarnermik sammisunik sammisaqarnikkut aaqqissuisimasoqartillugu.

Ullumikkut ingerlatsinermi unamminartoqartillugu aaqqiiniartilluta peqataanissamik kajumissuseqassasutit. Pingaartipparput, nammineerlutit sulisinnaassuseqartutit, pimoorussisuullutit, naammassisaqarluarsinnaassuseqartutit qiimasuullutillu.

Akissarsiat atorfininnermilu atugassarititaasut

Akissarsiat, atorfinitsitaanermilu atugassarititaasut, matumani akiliunneqarluni angalasinnaatitaanerit pequtillu assartorneqarnissaat ilanngullugit, Namminersornerullutik Oqartussat aamma Sulisunik Siulersuisut Kattufiat akornanni qaqugukkulluunniit isumaqatigiissutit atuuttut naapertorlugit inissinneqassapput.

Inissamik innersuussisoqarsinnaavoq malittarisassat sukkulluunniit atuuttut malillugit akilerneqartussamik.

Pineqaatissinneqarsimannginnermik uppernarsaat:

Atorfik una pineqaatissinneqarsimannginnermut allagartamik paasiniaanissamut inatsisitigut pisussaatitaavoq.  Inatsit naapertorlugu kommuni pineqaatissinneqarsimannginnermut uppernarsaammik aatsaat pippat atorfinitsitsineq aallartinneqarsinnaavoq. Taamaattumik erseqqissaatigineqassaaq ulloq atorfiniffissaq isumaqatigiissutaasinnaammat, kommunip pinerlussimannginnermik allagartaq politiinit tigoreernerata kingorna.

 

Qinnuteqarnissamut piffissarititaq atorfininnermullu ullorititaq:

Qinnuteqarfissaq kingulleq 18.10.2019

Atorfiniffissaq piaarnerpaamik imaluunniit isumaqatigiissuteqarnikkut.

Paasissutissat allat:

Atorfik pillugu annertunerusumik paasissutissat Ingerlatsinermut aqutsisumut Martin Jungersen +00299 527645, e-mail: maju@qeqqata.glsaaffiginninnikkut pineqarsinnaapput

Qinnuteqaat ilinnniarsimanermut uppernarsaatinik, imminut ilisaritinnermik, oqaaseqaatinik attaveqarfissanillu ilalerlugu, 2019-imi oktober-ip 18-ni tigoreersimassavarput.

Qinnuteqaat uunga nassiunneqassaaq:  

Qeqqata Kommunia

Sulisoqarnermut Allaffeqarfik

Postboks 1014

3911 Sisimiut 

 

E-mail: job@qeqqata.gl
Web: www.qeqqata.gl

Attavissaq:

Martin Jungersen

(+299) 52 76 45

maju@qeqqata.gl