Dronningip saqqarmiumik nersornaasiuttagaa tunniunneqarpoq

10. juni 2009

Dronningip saqqarmiumik nersornaasiuttagaa tunniunneqarpoq

Dronningip saqqarmiumik nersornaasiuttagaa tallimanngornermi ualikkut Borgmester Hermann Berthelsen-imit allaffimmi fuldmægtigimut Elisabeth Lyberth-imut tunniunneqarmat, Qeqqata Kommuniani Kommunalbestyrelsip ataatsimiittarfiani nalliuttorsiutigineqarpoq.

Saqqarmiup nersornaasiuttakkap tunniunneqarneranut ilaatigut tullinnguuttut tunngavigineqarput:

”Elisabeth Lyberth ukiuni 40-ni aalaakkaasumik peqqissaartumillu sulisarnermigut Kalaallit Nunaanni kommuninut immikkut nersortariaqartumik tunniussaqarsimavoq. Atorfeqarnermini suliatigut tunniuttagai, pisortaasarsimasut naammagisimaarluinnartarpaat. Qaanaap kommuniani assistent-itut atorfeqarnerani naatsorsuutinik nalunaarsuisarnernut, matumani akissarsiassanik, naatsorsuuserinermut tunngasunik bussillu naatsorsuutaannik suliaqartarneri ilanngullugit, kæmnerip pikkorinnerarlugulu, piumassuseqarluartutut, aalaakkaasumik sungiussisimasumillu sulisartutut taakkartorpaa. Elisabeth Lyberth atorfinikkamili kommunip naatsorsuutaanik suliaqartarpoq. Aalaakkaasumik sulisarpoq, suleqatinilu ullaakkut arfineq-pingasunut suliartunnginnerini eqqissilluni sulinissani pillugu ukiuni kingullerni 15-ini ullaakkut nal. 07.00 suliartortarluni. Elisabeth sungiussisimasumik naatsorsuutinik suliaqartarnermigut, suliatigut peqqissaartarnermigut, pisortat suleqatillu tungaanniit tatigineqarsinnaanermigut siunnersuisinnaanermigullu nersornaaserneqarpoq. Qeqqata Kommuniani aningaasaqarnermut allatseqarfimmi pingaarutilimmik inissisimavoq.”