Qeqqata Kommunia Aalborg-imi

8. oktober 2009

Qeqqata Kommunia Aalborg-imi

Qeqqata Kommuniani qinikkat Hermann Berthelsen, Søren Alaufusen, Katrine L. Lennert aamma Alfred Olsen oktobarip 7-anit 9-ata tungaanut Aalborg-imiipput. Kommunimi aalisarnermut piniarnermullu siunnersortut marluusut piniartullu marluk peqatigalugit Qeqqata Kommuniani Inuutissarsiutitigut Siunnersuisoqatigiit peqatigalugit nunat tamalaat akornanni aalisarnermik saqqummersitsivimmi DanFish-imi Qeqqata Kommunia avammut nittarsaappaat. Nordjylland-imi kommunip soqutigisaasa allat paasisaqarfiginissaat qinikkat angalanerini siunertat ilagaat.

Oktobarip 7-iani ilaatigut Aalborg-imi borgmesterip tikilluaqqusineratigut DanFish-ip ammarneqarneranut peqataapput. Tamatuma kingorna Borgmester Erik Sørensen, kommunimi pisortaaneq Jane Wiis aamma Frederikshavn-ip Kommuniani allatseqarfimmi sulisoq Lene Høegh, Qeqqata Kommuniani qinikkat sisamaasut siunissami suleqatigiinnissamut periarfissat eqqartorniarlugit nereqatigiinnertalimmik naapeqatigaat. Siunissami suleqatigiissinnaanermi ingerlariaqqinnissaq pillugu allaffeqarfiit suleqatigiillutik isumagissagaat napeqatigiinnermi isumaqatigiissutigineqarpoq.

Ualikkut ikuallaavik Reno Nord aamma tigooraavik I/S Mokana alakkarterneqarput. Kingullertut taaneqartup Kalaallit Nunaannit eqqakkat ulorinartut tigoorartarpai. Ilaatigut Sisimiuni eqqaavissuup ineriartortinneqarnissaanut isumassarsiorfigalugu eqqakkatigut iluarsiissutaasinnaasunik qinikkat Reno Nord-imi aamma Mokana-mi alakkarterinertik pissarsiaqaateqarfigaat.