Innuttaasunut ataatsimiititsineq: Naggataarutaasumik Pilersaarusiornermut atatillugu avatangiisit nalilersornerat (SMV)

8. januar 2010

ALUMIINIUMIK AATSITERIFFILIORNISSAMIK PILERSAARUT MISISSUEQQAARNERILLU PILLUGIT INNUTTAASUNIK ATAATSIMIITITSINISSAT.

Kalaallit Nunaanni Namminersorlutik Oqartussat (Namminersornerullutik Oqartussaasimasut) suliffeqarfillu amerikameersoq Alcoa-p akornanni Kalaallit Nunaannilu Maniitsumi Qeqqata Kommuniani alumiiniumik aatsiteriffiliorsinnaanermi periarfissanik qulaajaanissamik isumaqatigiissutip kinguneranik, ukiuni kingullerni misissuinerpaaluit ingerlanneqarsimapput. Misissuinerit tamakku, Qeqqata Kommuniani innuttaasut ilarpaalussuisa paasissutissiinermikkut allatigulluunniit sunniuteqaqataaffigisimasaat, massakkut naammassineqangajalerput. Taamaattumik suliffeqarfiit akisussaasut, misissuinernik tamakkuninnga ingerlatsisimasut, misissuinerminniit naliliigallarnitik sapaatip akunnerini tulliuttuni kommunimi innuttaasunik ataatsimiititsinertigut saqqumiukkusuppaat.

Misissueqaarnerit marlunnut immikkoortinneqarsinnaapput, tassalu:



• AVATANGIISINIK MISISSUINERIT kiisalu

• AVATANGIISINUT SUNNIUTEQARSINNAANERINIK NALILIINERIT



AVATANGIISINIK MISISSUINERIT ineqarnikkut, attaveqarnikkut angallannikkullu naalakkersuisoqarfimmiit akisussaaffigineqarpoq, AVATANGIISINUT SUNNIUTEQARSINNAANERINIK NALILIINERILLI Alcoa-mit Greenland Development-millu akisussaaffigineqarlutik. Misissuinerit annertussusiannik peqquteqartumik, ataatsimut isigaluni peqqinnissamut, avatangiisinut, pinngortitamut, inunnut atugassarititaasutigut, innutaasunut aningaasaqarnermullu tunngasutigut kiisalu teknikkimut assigiinngitsutigut tunngasutigut soorlu nunap saanaa, innuttaasunik ataatsimiititsinerit marluiit ingerlanneqassapput.



SISIMIUNI:

1) AVATANGIISINIK MISISSUINERIT pillugit innuttaasunik ataatsimiititsineq:

Ataasinngornermi januaarip 11-ni, nal. 19.00 Taseralimmi.



2) AVATANGIISINUT SUNNIUTEQARSINNAANERINIK NALILIINERIT innuttaasunik ataatsimiititsineq:

Nal.19.00 Taseralimmi.



MANIiTSUMI:

1) AVATANGIISINIK MISISSUINERIT pillugit innuttaasunik ataatsimiititsineq:

Pingasunngornermi januaarip 13-ini nal.19.00 Katersortarfimmi.



2) AVATANGIISINUT SUNNIUTEQARSINNAANERINIK NALILIINERIT innuttaasunik ataatsimiititsineq:

Marlunngornermi januaarip 19-ini nal.19.00 Katersortarfimmi.



KANGERLUSSUARMI:

AVATANGIISINIK MISISSUINERIT pillugit innuttaasunik ataatsimiititsineq:

Marlunngornermi januaarip 21-ni nal. 19.00 Qinnguata Atuarfiani.



Neriuutigivarput innuttaasut amerlasuut ataatsimiisitsinernut peqataajartorumaartut, tassa paasissutissarpassuit saqqumiunneqartussat pingaarutillit tusagaqarfigerusullugit kiisalu eqqarsaatitik isummatillu misissuinerni akisussaasunut tusartikkusullugit.