Qeqqata Kommuniani naammaqutissamik qinersinissaq

15. januar 2010

Nunaqarfimmi aqutsisut Atammik/Napasoq, ukioq manna apriilimi qinersivittut ataatsimoortinneqartumi, marlunngornermi januaarip 19-ni 2010-mi nunaqarfimmi aqutsisunut ilaasortassamik ataatsimik qinersiviussaaq.

Nunaqarfimmi aqutsisut siulittaasuata Søren Jakobsen-ip (IA), atammimmeersup novembarimi nunaqarfimmiit nuuttariaqalersimanerata kingunerisaanik nunaqarfimmi aqutsisunit tunuarneratigut naammaqutissatut qinersinissaq pisariaqalersimalluni.

Naammaqutissamik qinersinissaq qinersinissami inatsisip § 51-a naapertorlugu (Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Inatsisartut inatsisaat nr. 10, 31. oktober 1996-imeersoq) pissaaq, tassanilu allaqqalluni ”Partii kattusseqatigiilluunniit qi-nersivimmi ilaasortaaffiup inuttaaruttup inuttalernissaanut sinniisussamik peqanngippata naam-maqqutissamik qinersineqassaaq, taamaattoq tak. § 52”.

Partiit tamarmik kattusseqatigiillunilu qinigassanngortikkusuttut qinigassanngortitsisinnaapput. Qinigassanngortitsiniarnermik nalunaarfissap iluani tallimat qinigassanngortillugit nalunaarutigineqarnikuupput. Ukuuppullu:

Niels Poulsen (A) Atammik

Hans Frederik Poulsen (IA) Atammik

Dipo-Bolethe Jakobsen (S) Atammik

Jonas Poulsen (S) Atammik

Hansine Møller (S) Napasoq

Qinersinissaq Atammimmi Napasumilu nunaqarfinni allaffinni nunaqarfimmi aqutsisussanik qinersisarnertuulli nal. 9:00-miit 20:00-ip tungaanut ingerlanneqassaaq.

Atammimmi qinersinermik nakkutilliisuussalluni Holger Elias Poulsen, Napasumilu Pauline Nikodemussen.

Atammimmi qinersisinnaasut 141-put, Napasumilu 68-llutik, katillugit qinersisinnaasut 209-llutik.