Angallannermut kommissionip suliassaa aaqqitaareerami?

17. februar 2010

Borgmesterit pingasuusut Jess Svane-p, Hermann Berthelsen-ip aamma Simon Simonsen-ip Naalakkersuisut pilersitaanni Angallannermut kommissionimi arfinillit kikkut ilaasortanngortitaasimanerat takugamikkit taama aperipput.

Ilaasortat pingasut Danmark-imi najugaqartuupput, ilaasortallu allat pingasut Nuummi najugaqarmata pasinarsilluni, Danmark-imiit Nuummut attaveqarneq pingaarnerusutut inissitaasoq, taama borgmesteri Jess Svane isumaqarpoq.

Tamannalu suli ersarinnerulerluni, toqqakkat taakku kikkuuneri ilisimalerlugit. Ilaasortat marluk imarpik qulaallugu mittarfeqarnissamik umiarsuarmillu ikaarlugu Nuummi talittarfeqarnissamik soqutiginnittorujussuupput.

Ilaasortat ilaat ukiorpassuarni Nuup illoqarfiani inissianik arlalissuarnik pigisaqartuuvoq. Nuummilu Attaveqaatit annertusisarnissaasigut qularnanngitsumik inissiaatit nalitunerulerumaarlutik.

Ilaasortaq alla Namminersornerullutik Oqartussat Nuup Kommuniatalu nalaanni Nuup illoqarfiani attaveqaatitigut sanaartukkani siunnersortaasarsimalluni. Pineqartorlu piffissami kingusinnerusumi nunami maani siunnersorteqarfiit annerpaat ilaanni pisortatut ”Ilulissat Nuullu Mittarfeqarfiisa Umiarsualiveqarfiisalu allilerneqarnissat pillugu suleqatigiissitamut” Nuup Kommuneanit, Ilulissat Kommuneanit Kalaallit Nunaannilu Namminersornerullutik Oqartussat pilersitaanni siunnersortaasimavoq.

Suleqatigiissitaq taanna suliaqarnerani ullumikkut naalakkersuisoqarfimmi pisortaasumit allattaaffigineqarsimavoq, taassumalu taamanituulli ullumikkut matuma qulaani pisortaq pineqartoq suliaqartitatut ilaatissallugu pissusissamisoortutut isigisimagunarlugu.

Suleqatigiissitap 2007-imi inerniliineratut 2010-mi inerniliisoqassappat borgmesterip Hermann Berthelsen-ip tupaallannartuutinnianngilaa. Taamani ilaatigut inerniliusoqarluni ”Nuummi 2200 meteri-tut takitigisumik miitarfiliortoqarnissaa sulissutigineqaruni pitsaanerpaassaaq. 1799 meteritut takitigisoq innersuussutigineqarsinnaanngilaq, assersuutigalugu Air Greenland-ip ullumikkut Kangerlussuarmut atugaanut Airbus 330-mut naappallaaqimmat”.

Inuit taakku allannguuteqaratik ullumikkut Angallannermut kommissionimi ilaasortaatitanngortut Namminersorlutillu Oqartussaniittut, Nuup Kommuniani Namminersornerullutillu Oqartussani siunnersortitut 2007-imi inerniliinerminnik allaanerusumik inerniliiumaarnissaat borgmesteri Simon Simonsen-ip qularutigivaa. Angallannermut kommissionip suliassaa siumoortumik aaqqitaareersorinarpoq, taamaakkaluarli Angallannermut naalakkersuisup Jens B. Frederiksen-ip akulerunnissaa neriuutiginarluni – Nuup Kommuniani Kommuneqarfik Sermersuumilu kommunalbestyrelsimut ilaasortaasimanermigut qilersugaavallaanngikkuni!

Borgmesterit pingasuullutik isumaqatigiipput, Kalaallit Nunaata Kitaani nunap tamarmi innuttaasa illoqarfinnut tallimanut tamarmik 5.000-t sinnerlugit inuttalinnut katersuunnissaannik Angallannermut kommissionip siunnersuutigigallagaa akuersaarneqarsinnaanngivissoq. Tamatumaniliuni siunissami Kommuneqarfik Sermersuup avataani aatsitassarsiornikkut, uuliasiornikkut gassisiornikkullu ineriartortitsinissamik pilersaarutit Angallannermut kommissionip isiginiarsimagunanngikkai.