Qeqqata Kommuniata takorluugai pingaartitaalu

24. februar 2010

Qeqqata Kommunia kommunerujussuarmut nutaamut takorluukkanik pingaartitanillu arlalinnik naammassinningajalerpoq

2009 ukiaani Maniitsumi Sisimiunilu kommunip suliffeqarfiutaani pingaarutillit pingaaruteqassusaat eqqartorneqarnikuupput nassuiaasersorneqarlutillu.

Suliniut maanna ima angusaqarfioreertigivoq, kommunalbestyrelsi februaarip 23-ani ataatsimiileruni takorluugaq pingaartitallu isummerfigisinnaanngussallugit, taamaalillunilu kommunip tunngaviusumik isumaa pisortatigoortunngortillugu. 

Takorluugaq tassaavoq: 

          • Qeqqata Kommunia Nunatta Ineriartorfiatut akisussaaffimmik tigusiniarpoq peqataanikkullu ilimanaateqarsinnaasut piviusunngortillugit.

Pingaartitat tassaapput:

          • Kaammattuineq

          • Akisussaaqataaneq

          • Ataatsimoorneq

          • Piginnaasanik ineriartortitsineq

          • Oqaloqatigiinneq

Ajunngitsuliorfigeqatigiinneq

Takorluukkap pingaartitallu kommunip najornissaanut pitsaanerulersissavaa, ilorrisimaarnarnerulersillugulu. Taamaattorli takorluugaq pingaartitarlu Qeqqata Kommuniani sulisunuinnaq atuutissanngilaq.

Takorluukkap pingaartitallu aammattaaq innuttaasut kommunerujussuarmi katersornissaat siunertaraat. Kommunip suut pingaartinnerai aammalu tunngaviusumik qanoq isumaqarnersoq innuttaasut sulisullu ilisimanissaannut periarfissaassaaq.

Pingaartitat kommunimi sulisunut qanoq isumaqarnersut paasiniarlugu, pingaartitat eqqartornikuaat aammalu kommunimi suliffeqarfiit tamarmik immikkut pingaartitat nassuiaataannik paasinninnerminnillu kommunimut nassiussaqarnikuupput.

Taakku saniatigut pingaartitat qanoq paasineqarnissaannik ulluinnarnilu suliffeqarfimmi sulinermi atorneqarsinnaanerinik suliffeqarfiit kommunimut siunersuusiornikuupput. Ungasinnerusoq isigalugu Qeqqata Kommunia neriuppoq, takorluukkat pingaartitallu ammanerunermik, iluarisimaarinninnerulernermik kommunilu suliassanik pitsaanerusumik aaqqisalernissamik pilersitsissasoq.