Kangaamiut tamaasa nalunngilai

Louisannguaq Rosing aamma Sofiaaraq Larsen Kangaamiuni kommunip allaffiani suliffitsik nuannareqaat
29. marts 2010

Louisannguaq Rosing aamma Sofiaaraq Larsen Kangaamiuni kommunip allaffiani suliffitsik nuannareqaat

                                     

                                           
Louisannguaq Rosing aamma Sofiaaraq Larsen

Ilitsivimmiit ilitsivimmut mappet tulleriaaginnaapput. Mappet ilitsiviit marluk ulikkaaqqavaat. Taakkuli kusassaataannaanngillat. Mappet atorfissaqartinneqaqaat, aamma atorluarneqaqaat. 

Kangaamiuni kommunip allaffiani Louisannguaq Rosing aamma Sofiaaraq Larsen innuttaasunik saaffiginnittussanik tigusissallutik issiapput. Saaffiginnittusaasinnaasut sumut tamanut tunngasuusinnaapput, sulinngiffeqarnissamik qinnuteqaatiniit nunaminertanik atugassiinernut. Taamaattumik mappet amerlasuujupput. 

- Suna tamaat ilisimassavarput, Louisannguaq Rosing qungujulaarpoq.

Kangaamiut 360 missaani innuttaqarpoq. Taakkununnga sullissisussat kommunip allaffiani sulisut sisamaapput, Louisannguaq aamma Sofiaaraq saaffiginnittarfimmiipput, aamma Ilaqutariinnermut immikkoortumi marlunnik sulisoqarpoq.

Saaffiginnissutinut tamanut marluinnaalluni sulissalluni artornannginnersoq apeqqummut marluullutik akipput tamanna sungiutiinnarsimallugu, aammalu inunnik ikiuinissartik nuannaralugu. Louisannguaq aamma Sofiaaraq, naak innuttaasut ilisimagaluarlugit qujanartumik misigisimapput innuttaasutit tatigineqarlutik. Kisianni ikiorneqarnissamik pisariaqartitsisut ilaqutaappata ikinngutaappataluunniit, pineqartut allamut saaffiginnitsinneqartarput. Louisannguaq Rosing aama Sofiaaraq Larsen taamaaliornermikkut nunaqarfimmi innuttaasut assigiimmik sullinneqarnissaat anguniarpaat.