Arctic Circle Region-imi qulimiguullit nutaat

Greenland Aviation aamma Igloo Mountain Arctic Circle Region-imi Sisimiuni angerlarsimaffilerlugu silaannakkut takornariartitsisarnerup, heliskiingertitsisarnerup allanillu qulimiguulik atorlugu neqerooruteqartarnerup inerisarneqarnissaannut asseqanngilluinnartumik imaannaanngitsumik suleqatigiilerput.
19. marts 2010

Greenland Aviation aamma Igloo Mountain Arctic Circle Region-imi Sisimiuni angerlarsimaffilerlugu silaannakkut takornariartitsisarnerup,  heliskiingertitsisarnerup allanillu qulimiguulik atorlugu neqerooruteqartarnerup inerisarneqarnissaannut asseqanngilluinnartumik  imaannaanngitsumik suleqatigiilerput.

Arctic Circle Region-i qulimiguulimmik  ilaatigut misigisassarsiorluni angalanermi atorneqarsinnaasumik pisaarpoq, taamatut Arctic Circle Region allappoq.

Mittarfimmi Qeqqata Kommuniani borgmesteri Hermann Berthelsen allarpassuillu takkussimasut, qulimiguulinnut marluusunut sapaatip akunnera ataaseq atorlugu Canadap qiterpasissuianit Ontario-mit aggertunut tikilluaqqusisuupput. Aqqussua takeqisoq Quebec, Canadap kangiata sineriaa atuarlugu Iqaluit tikillugu tamatumalu kingorna Cape Dyer-ip eqqaatigut Davis Stræde aqqusaarlugit ingerlasimapput.

                                          

Pilersaarutip piviusunngortinneqarnera aamma Sisimiut aallaavigalugu takornariartitseqatigiinnut Igloo Mountain-imut immikkut nuannaarutaavoq, taanna Arctic Circle Region tamakkerlugu qulimiguulik atorlugu neqerooruteqarnerup inerisarneqarnissaanut Greenland Aviation-mut ataasiakkaatigut isumaqatigiissuteqarpoq.

Igloo Mountain-imi pisortaq, Laarseeraq Skifte ima oqaaseqarpoq:



- Qulimiguulimmik illoqarfitsinnut tikiussisinnaanermik sapiissuseqartoqarnera nuannaarutigisorujussuuarput, tamannami Arctic Circle Region-imi neqeroorutaasinnaasuni nutaajullunilu iluaqutaalluarsinnaavoq.  Silannakkut takornariaqatitsineq, heliskiing, sermersuamut angalaneq, helihikes allarpassuillu qulimiguulik atorlugu neqeroorutigineqarsinnaasut soorlu umiarsuiarnut takornariartaatinut ilaasunut, misigisassarsiorlutik angalasunut aammalu illoqarfimmiunnut neqeroorutigisinnaavagut.”

Qulimiguulik tallimanik issimasoqarsinnaavoq, aamma slingloads-imik (usinik assartuinermi atortoq), annanniummik, sisoraatinut  ilitsivissamik kiisalu nassatanut atortorisaarutinullu allamik inissamik atortulersugaavoq.