Inuiattut ullortunersiornerit 2010

Sisimiuni 2010-mi Inuiattut Ullorsiorneq
Sunngiffimmi pisortap Fali Kleist-ip Sisimiuni 2010-mi Inuiattut Ullorsiorneq kingumut qivialaarpaa, tassa pissusissamisoortumik nalliortorsiutigineqarnerani. Nalliuttorsiornerlu ukioq manna ullunut sisamanut siammagaavoq.
24. juni 2010

Inuiattut ullortunersiornerit 2010  

Sisimiuni 2010-mi Inuiattut Ullorsiorneq Sunngiffimmi pisortap Fali Kleist-ip Sisimiuni 2010-mi Inuiattut Ullorsiorneq kingumut qivialaarpaa, tassa pissusissamisoortumik nalliortorsiutigineqarnerani. Nalliuttorsiornerlu ukioq manna ullunut sisamanut siammagaavoq. Tallimanngornermi Taseralimmi piginnaasalinnik unammisitsinersuaq ingerlanneqarluni, unnullu erinarsornikkut, qitinnikkut isiginnaartitsinertigullu nuannersumik atorneqarluni. Arfininngornermi Bøfhuset-mi Pinnguarfimmilu sammisassaqarfiulluni kiisalu sapaammi ilaatigut SAK S-68-ilu arsamik unammillutik, tamatumanilu SAK ajugaalluni. Sapaammi unnukkut peqatigiiffiit qisuttarnissamut kajumissaarneqarnikuullutik, tassa inuiattut nalliuttorsiornermi ikumatitseqatigiinnissamut atugassanik. Ajoraluartumilli taamatut qisuttaqatigiinnissamut takkuttoqanngilaq, taamaakkaluarli Minngortuunnguup Atuarfiata qisuppaalorujussuit tunniussinnaasimavai, taamaalilluni ulloq taanna annaanneqarluni. Inuiattut Ulluani nalliuttorsiutiginninneq pisarnertut kommunip allaffissuata silataani katersuunnikkut aallartinneqarpoq, tamatumalu kingorna oqaluffimmut ingerlaaqatigiinnermi katinngatinik erfalasulisartut siuttuullutik. Ullaap tungaani sammisaqartitsineq tamarmik innuttaasunit peqataaffigineqarluartumik pujualaaraluarluni kialaartumi ingerlanneqarpoq. Qeqqata Kommuniani katersugaasiviit meeqqat inuusuttullu kajumissaarsimavaat aggerlutik illoqarfiit Sisimiut Maniitsorlu ukioq 2030-mi qanoq takorloorneraat qalipaqqullugu. Ulloq naallugu meeqqat inuusuttullu katersugaasivinnut takkutillattaartuarsimapput, tamatumanilu annoraamerngit marluk tamarmik 5 meterinik takissusillit qalipaaffigineqarnerini peqataallutik, tassa illoqarfinni taakkunani tamani ataaseq. Inuiattut Ullorsiorneq qangiutereeriarpat illoqarfinni taakkunani qalipatat saqqummersinneqassapput. Tamatuma kingorna taakku katersugaasivinnit ukiuni 20-ni toqqortaatigineqassallutik, ukiumilu 2030-mi saqqummersinneqaqqikkumaarlutik. Ualikkut marlunut puiseqqaanniuunneq allartinneqarmat inuit untritilippaalussuit katersuussimapput, umiatsiaaqqat 14-it pisaqaqqaanniuullutik aallarnerat malinnaaffigalugu. Utaqqiisalu peqatigiiffik Qajaq qaannamik sukkaniuutitsilluni, taamatullu meeqqat mikisut kinngusaqattaartullu aamma takutitsillutik. Nalunaaquttap ataatsip qangiutilernerata missaani pisaqaqqaartoq Thimothæus Filemonsen tikippoq. Ualikkut pingasut missaanni Akiani qaqiffissiaq ammarneqarpoq (tassa Nukissiorfiit sakkukillisaaviata eqqaani). Ikumatitallu 30-t missaanniittut ulloq sinnersua eqqaanni inuppassuit nuannallutik, igaartuullutik kissartortuullutillu. Ilaatigut nerisassat assigiinngitsut pingasut ikumatitani ataasiakkaani qalanneqarlutik. Tamarmik ilaquttatik ikinngutitillumi ilagalugit nuannappaseqaat, sumiiffillu soorluuna aasivissiorpalaavilluni. Ajoraluartumillu unnukkut arfineq-pingasut qeqqata missaani sialualaalerluni, taamaalillunilu tamaani nalliuttorsiorpalaarneq tammakariartulerluni, ilaalli suli qalatassaminnik qalanniaallutik. Arfineq-pingasunulli nalunaarutigineqarluni sila patsisaalluni inuiattut ullorsioqatigiinneq tamaanga naaneqalersoq.