Akiani Sisimiiniittumi inissiaqarfik pillugu Kommunimi pilersaarummut tapiliussaq nr. 38-p tamanut nalunaarutigineqarnera

Kommunimi pilersaarummut tapiliussaq sapaatip akunnerini arfinilinni piffissami maajip 3-aniit juunip 14-ianut 2010 tamanut tusarniutigineqarnikuuvoq
7. juli 2010

Kommunimi pilersaarummut tapiliussaq sapaatip akunnerini arfinilinni piffissami maajip 3-aniit juunip 14-ianut 2010 tamanut tusarniutigineqarnikuuvoq. Kommunimi pilersaarummut tapiliussaq juunip 17-iani kommunalbestyrelsimit inaarutaasumik akuersissutigineqarpoq, juunillu 30-ni nalunaarutigineqarluni.

Akiani inissianik nutaanik akuleriiaanik sanaartornissaq periarfissaqalerniassammat, Kommunimi pilersaarummut tapiliussaq nr. 38 suliarineqarpoq. Immikkoortumi pilersaarut A20 ullutsinnut naleqqukkunnaarmat kommunimi pilersaarusiornermi tapiliussaq suliarineqarpoq.

Immikkoortumi pilersaarut A20 2006-imi akuersissutigineqarpoq, 2008-milu aasakkut immikkoortumi sanaartorfigissaaneq aallartinneqarluni. Sanaartorfigissaanerup ingerlanneqarnerani aqqusinniorfissat il.il. illuartinneqarput. Tamatumalu kinguneraa, sanaartorfiusussatut pilersaarutit ilaat sanaartorfiusinnaajunnaarmata, taamaattumillu allamut inissiisoqartariaqalerluni.

Immikkoortumi pilersaarut A20 suliarineqarmalli ilaqutariinnut ataatsinut/affarleriinnik illuliornissami sanaartorfissatut immikkoortinneqartumit 150 m2-imit annikinnerusumik sanaartorfissamik noqqaassuteqartoqarnerusimavoq, ilaatigut sanaartorfigissaanermi akigitinneqartoq patsisaalluni. Noqqaassutigineqartut kommunalbestyrelsip naammasserusuppai annertussutsillu assigiinngisitaarnerusut qulakkeerusullugit, taamaalillunilu assigiinngisitaartumik sanaartornissamik nalinginnaasumik kissaateqartoqarnera tamatumuuna taperserneqarluni. Ataasiakkaani sanaartorfigissaanermi aningaasartuutit qaffariarnissaat pinngitsoorniarlugu, sanaartornermi akulikissuseq immikkoortumi pilersaarut A20-miittoq malinneqassaaq.

Sisimiuni kissaatigineqartunut tunngatillugu illoqarfinni illunik sanaartornissami, tallimat tamarmik immikkut 400 m2-it missaani sanaartorfissallit aningaasaleeqataaffiginiarlugit Namminersorlutik Oqartussat aammattaaq nalunaaruteqarnikuupput, tamannalumi kommunalbestyrelsimit akuersaarusunneqarpoq. Tamatumani pilersaarusiornermi tunngavissaq nutaaq pisariaqartinneqarpoq, tamannalumi kommunip pilersaarusiorneqarneranut tapiliussap matuma suliarineqarneranut patsisaaqataavoq.

TAPILIUT 38 KOMMUNEMI PILERSAARUT 1992-2005