Aasaanerani piniarneq.

2010-mi 2011-milu tuttunniarnissamut umimmanniarnissamullu Naalakkersuisut ukioq manna kingumut piumasaqaatit atuuttut ingerlateqqippaat.
16. juli 2010

2010-mi 2011-milu tuttunniarnissamut umimmanniarnissamullu Naalakkersuisut ukioq manna kingumut piumasaqaatit atuuttut ingerlateqqippaat.

Tuttunniarneq:

Region 2-mi (Sisimiut-Kangerlussuaq) piniarsinnaaneq aggustip aallaqqaataani aallartissaaq, sunngiffimmilu piniartunut novembarip 15-iani naassalluni. Inuussutissarsiutigalugu piniartut region 2-mi 2011-mi februaarip 28-ata tungaanut aavarsinnaapput.

Region 3-mi (Maniitsoq-Nuuk) piniarsinnaaneq aggustip aallaqqaataani aallartissaaq, sunngiffimmilu piniartunut inuussutissarsiutigalugulu piniartunut piniarsinnaaneq novembarip 15-iani naassalluni.

Region 3-mi ukiuunerani piniartoqassanngilaq.

Umimmanniarneq:

Maniitsup ingerlatsiviani:

Sunngiffimmi piniartunut inuussutissarsiutigalugulu piniartunut piniarsinnaaneq aggustip aallaqqaataani aallartissaaq, novembarillu 15-iani naassalluni.

Inuussutissarsiutigalugu piniartunut sunngiffimmilu piniartunut ukiuunerani piniarsinnaaneq 2011-mi februaarip aallaqqaataani aallartissaaq, 2011-milu marsip 10-ani naassalluni.

Inuussutissarsiutigalugu piniartut sunngiffimmilu piniartut Maniitsup ingerlatsiviani umimmanniarusuttunut kiffartuussiviit tamarmik akuersissutinik tunniussisinnaapput.

Sisimiut ingerlatsiviani:

Sunngiffimmi piniartunut inuussutissarsiutigalugulu piniartunut piniarsinnaaneq aggustip aallaqqaataani aallartissaaq, novembarillu 15-iani naassalluni.

Inuussutissarsiutigalugu piniartunut sunngiffimmilu piniartunut ukiuunerani piniarsinnaaneq 2011-mi februaarip aallaqqaataani aallartissaaq, 2011-milu marsip 10-ani naassalluni.

Ukiuunerani umimmanniarnissamut piumasaqaatit, piniarnissamullu piffissarititaasut allat uani takukkit.

Akuersissutinik tunniussinissami periuseq:

Qinnuteqartut (16-ileereersimasussat) piniarnermut allagartamik atuuttumik takutitsissapput, qinnuteqartunullu allattorsimaffimmut ilanngunneqarlutik. Nuummi Namminersorlutik Oqartussani aalisarnermut piniarnermullu aqutsisoqarfiup akuersissutit atsiukkat naqitallu kommunimut nassiuttarpaat, kommunillu agguaatissallugit.

Nunaqarfinni kommunip allaffiinut, Maniitsumi kommunip allaffiani piniarnermut aalisarnermullu siunnersortimut, Sisimiunilu nutaaliorfimmut saaffiginnittoqassaaq. Malugalugu: Sisimiuni 2010-mi juulip 16-ianit 23-at tikillugu saaffiginnittarfimmut saaffiginnissagassi.

Sumiiffinni ammasumik piniarnissamut ukiuni marlunni najugaqarsimanissaq immikkut akuersissuteqarnissamut suli piumasaqaataavoq, soorluttaaq tuttut umimmaallu eqqarsaatigalugit piniarnermut allagartap maajip aallaqqaataani akilersimanissaa piumasaqaataasoq.

Nalunaaruteqartussaatitaaneq

Uumasut pisarineqarsimasut tamaasa immikkut immersugassakkut nalunaarsorneqassapput (akuersissummut ilanngullugu tunniunneqartussaq), piniarfissap naammassereernerani kingusinnerpaamik sapaatit akunneri pingasut qaangiutinnginnerini kommunimut tunniunneqartussaq.