Bussinik ingerlatsinerup suliariumannittussarsiunneqarnera iluatsilluartoq

Sisimiuni bussinik ingerlatsinerup namminersortunut tunniunneqarneranit sapaatip akunneri pingasut missaat qaangiummata, illuatungeriit naammagisimaarinnillutik naapipput
20. juli 2010

Sisimiuni bussinik ingerlatsinerup namminersortunut tunniunneqarneranit sapaatip akunneri pingasut missaat qaangiummata, illuatungeriit naammagisimaarinnillutik naapipput. Bussinik ingerlatsineq ajornartorsiutitaqanngitsumik tunniunneqarpoq, Polar Entreprise A/S-illu kiffartuussineranut atuisut naammagisimaarinnillutik.

Sisimiuni bussinik ingerlatsinerup ukiuni tulliuttuni tallimani isumagineqartussanngorlugu suliariumannittussarsiuunneqarnerani Polar Entreprise A/S ajugaanermigut, 2010-mi juulip aallaqqaataanit bussinik ingerlatsineq isumagilerpaa. Innuttaasunik kiffartuussilluarnissaq Polar Entreprise A/S-ip anguniagaraa. Tamatumunnga atatillugu bussit unnukkut sapaatip akunnerisalu naanerini sivisunerusumik angalasinnaanissaannut, Teknikkimut avatangiisinullu ataatsimiititaliamut qinnuteqarnissartik pilersaarutigaat.

Kommunip kiffartuussinermi suliassaataasa namminersortunngorsarneqarnissaannik Qeqqata Kommuniani kommunalbestyrelsip kissaateqarneratigut, bussinik ingerlatsineq suliariumannittussarsiunneqarpoq. Kommunip kiffartuussinermi suliassaataasa suliariumannittussarsiuunneqarnerisigut namminersortunngorsarneqarnerisigullu, kommunimi inuussutissarsiutitigut ineriartortitsinissamut iluaqutaasumik suliffeqarfinnik nutaanik pilersitsinissamik, suliffeqarfinnilluunniit pioreersunik ineriartortitsinissamik periarfissiivoq.

Kangerlussuarmi bussinik ingerlatsineq 2010-mi juulip aallaqqaataani tunniunneqarluni aamma suliariumannittussarsiuunneqarnikuuvoq. Kangerlussuarmi bussinik ingerlatsineq siullermeertumik suliariumannittussarsiuunneqarani isumaqatigiissutaasimasoq 2010-mi juunip 30-ani atorunnaarpoq. Ukiuni tulliuttuni tallimani bussinik ingerlatsinerup suliariumannittussarsiuunneqarnerani Kang-Byg ApS ajugaavoq. Bussitoqqanut taartissanik bussinik nutaanik pitsanngorsakkanillu Kang-Byg ApS pisereerpoq. Tamatuma saniatigut innarluutillit aneerussivilisartullu bussersinnaanngorlugit aappaagu pitsanngorsaaniarput.

Sisimiuni Kangerlussuarmilu bussinik ingerlatsineriinnaat suliariumannittussarsiuunneqarput. Bussinut inissiiviit aserfallatsaalineqarnissaat, bussillu ingerlaarfissaasa pilersaarusiorneqarnissaat Qeqqata Kommuniata suli akisussaaffigaa.
Bussinik ingerlatsineq pillugu ajornartorsiuteqartillugu saaffissat:
Sisimiut: Polar Entreprise A/S, info@pe.gl, tlf: 865973
Kangerlussuaq: Kang-byg Aps, kangbyg@greennet.gl, tlf: 524185

Paasissutissat annertunerusut:
Aningaasaqarnermut, teknikkimut avatangiisinullu pisortaaneq Laust Løgstrup tlf.: +299 867310

Polar Entreprise A/S-imit Lars Kristian Madsen aamma Karen Lennert kiisalu Qeqqata Kommuniani Teknikkimut Avatangiisinullu Immikkoortortamit Niels Bendtsen, Sisimiut illoqarfiani bussit nr. 7-ip saani.


Bussinik ingerlatsisoq Tage Kangerlussuarmi bussit nutaat eqqaanni.