Maniitsumi innuttaasut suliniutaat angusaqarfiuvoq: Maniitsumi arfersiorfik marlunngorpat ammassaaq

Maniitsumi Tunoqqusaap saavata nunataani qaqqajunnami saarlerpaami arfersiorfik pilersinneqartoq kommunalbestyrelsimit marlunngornermi aggustip 24-ani nal. 17.00 ammarneqassaaq. Illoqafimmi innuttaasut tamarmik tikilluaqqusaapput.
1. januar 0001

Maniitsumi Tunoqqusaap saavata nunataani qaqqajunnami saarlerpaami arfersiorfik pilersinneqartoq kommunalbestyrelsimit marlunngornermi aggustip 24-ani nal. 17.00 ammarneqassaaq. Illoqafimmi innuttaasut tamarmik tikilluaqqusaapput.

Arfersiorfik ikaartarfiuvoq marlunnik angisuunik isiginnaarfissalik, tassanngaaniit aasaanerani ingammik qipoqqarnik Maniitsup eqqaata imartaani takussaalluartartunik isiginnnaartoqarsinnaalluni. Kisianni ukioq kaajallallugu Maniitsumi innuttaasunut nunataasinnaavoq ornikkuminartoq, tassanngaaniit Maniitsup avatangiisai qaqqat kusanartut imaanullu isikkivik kusanartuulluni. 

 

Maniitsup siunissaa pillugu innuttaasunik oqallitsitsinermi 2009-mi kommunip innnuttaasunik aggersaaneranut atatillugu arfersiorfik suleqatigiinnit pilersinneqartut suliaannit inerneruvoq. Arfersiorfeqarnissaanik isuma kultureqanermut takornariaqarnermullu suleqatigiisitamit saqqummiunneqaqqaarpoq, arferit Maniitsoq immikkuullarissuutittaraat tamatumani eqqartorneqarluni, illoqarfimmi innuttaasunut aammalu aasaanerani takornariarpassuarnut. Isumassarsiaq innuttaasut ataatsimiitinneqarneranni saqqummerpoq, qisuariarfigilluarneqangaarmallu, kommuni suliniut piviusunngortinniarlugu aalajangiivoq. Suliniummik pilersitsiniarlunilu sulinermi Maniitsumi Teknikkimut ingerlatsivik annertuumik suliaqarnikuuvoq, qisuillu qajannaatsut atorlugit suliaq kusanartumik atoruminartumillu inerneqarpoq.  

Maanna innuttaasunik suleqatigiinnik ”arfernut suleqatigiit” pilersitsisoqarpoq, Qeqqata Kommuniani inuutissarsiornermut siunnersuisooqatigiinnik suleqateqarlutik arfersiorfissamik suliniutinik ilalersuisussanik, sumiiffik orniguttunut tamakkiisumik misigisaqarfiunissaanut, Maniitsorlu angalasunit orninneqarnissaanut pilerisaarnissaanut ilaassallutni. Arfersiorfimmiit uumasut takuneqarsinnaasut pillugit paasissutissiivinnik ikkussuisoqassasoq Ilaatigut suliniutigineqarpoq qinngummillu nunamut ikkussimasussamik ikkussisoqarnissaa, taamaalillutik inuit arferit qanillillugit takusinnaaniassammatigit. Taanna aamma meeqqanut atuarfiini atuartunut atuartitsinermut ilanngullugu tammaarsimaarfissaqqissuuvoq.