Siunissamut takorluukkat pillugit Maniitsumi innuttaasunik ataatsimiisitsineq

Pilersaarusiornermi periusissat pillugit Qeqqata Kommuniata pilersaarutaa aamma Maniitsoq pillugu Maniitsup qanoq ineriartortinneqarnissaanik eqqarsaatersuutiminnik siunnersuutiminnillu 70°N-ip nalunaarusiaa pingasunngornermi aggustip 25-ani nal. 19.00 Maniitsup katersortarfiani saqqummiunneqassapput.
24. august 2010

Pilersaarusiornermi periusissat pillugit Qeqqata Kommuniata pilersaarutaa aamma Maniitsoq pillugu Maniitsup qanoq ineriartortinneqarnissaanik eqqarsaatersuutiminnik siunnersuutiminnillu 70°N-ip nalunaarusiaa pingasunngornermi aggustip 25-ani nal. 19.00 Maniitsup katersortarfiani saqqummiunneqassapput.

Qeqqata Kommuniani Kommunalbestyrelsi, kommunimi qullersat takorluukkallu pillugit pilersaarusiamut titartaasartut ataatsimiinnermi apeqquteqaatigineqarumaartussanik akissuteqarniarlutik peqataassapput. Taamaalilluni pilersaarusiornermi periusissat nalunaarusiarlu pillugit eqqarsaatersuutigineqartut paasisaqarfigilluarnissaannut ataatsimiisitsineq periarfissatsialaavoq, soorluttaaq Maniitsup qanoq ineriartortinneqarnissaa pillugu politikerit, atorfillit innuttaasullu akornanni oqallinnissamik kajumissaataasoq. Taamaattumik innuttaasut isummaminnik anitsinissaannut periarfissaavoq immikkuullarissoq.

Inuussutissarsiornermut Aatsitassarsiornermullu Naalakkersuisoq Ove Karl Berthelsen peqataassaaq, Greenland Development-imit aallartitat, soorluttaaq Alcoa-mit aallartitat tusarnaartut akornanniillutik peqataassasut.

Norskit titartaasartut 70°N marloriarlutik Maniitsumeereerput, pingaartumillu alumiiniumik aatsiterivissap pilersinneqarnissaa siunertaralugu Maniitsup siunissami qanoq ineriartortinneqarlunilu ilusilersorneqarnissaa pillugit periarfissat takorluukkallu pillugit innuttaasunik, kommunimik allanillu attuumassuteqartunik eqqartueqateqarlutik.

Qeqqata Kommuniata pilersaarusiornermi periusissatut pilersaarutai tamanut saqqummiunneqarpoq, aggustimilu kommunimi innuttaasunut tamanut agguaanneqarluni.