Kommunit kattunnerinik sulisut nalilersuillutillu pitsanngorsaaniarput

Qeqqata Kommuniani eqqaamajuassallugu pingaartinneqarpoq, kommuunerujussuartut aatsaat qanittumi pilersinneqaratta, tamannalumi sulisunut innuttaasunullu unammillernertorpaalunnik pilersitseqataavoq.
10. september 2010

Qeqqata Kommuniani eqqaamajuassallugu pingaartinneqarpoq, kommuunerujussuartut aatsaat qanittumi pilersinneqaratta, tamannalumi sulisunut innuttaasunullu unammillernertorpaalunnik pilersitseqataavoq.

Pingaaruteqarporlu kommunip aaqqissuussinerup innuttaasunillu kiffartuussinerup qanoq isikkulersornissaa tamatigut eqqaamasariaqarmagu, taamaaliornikkummi innuttaasunut sulisunullu atugassarititaasut pitsaanerulissammata. Taamaattumik Qeqqata Kommuniani allaffissuarmi sulisut tamarmik aasap ingerlanerani nalilersueqataapput, tamatumani Maniitsup Kommuneata Sisimiullu Kommuneata Qeqqata Kommunianut kattunnerat qanoq ingerlasimanersoq takuniarlugu.

Sisimiuni septembarip 1-ani Maniitsumilu septembarip 8-ni allaffissuarni sulisut isumasioqatigiinnikkut nalilersueqataapput. Ullut taakku atukkat pitsaasumik kinguneqarluartumillu sulisunit peqataaffigineqarluarlutik ingerlanneqarput, tamatumani sulisuniit iluaqutitut isigisat ernumassutaasinnaasullu qulaajaaffigineqarlutillu oqallisigineqarluarlutik. Ernumassutaasinnaasut KompetenceKompagniet peqatigalugu unamminartutut inissinneqarlutik. Isumasioqatigiinnerullu naammassinerani unamminartut qulaajaneqarlutik, taamaalillutik aaqqissuussaanerup iluani sumiinneri ersarissarneqarlutik.

Ukiap ingerlanerani isumasioqatigiinnermi atortut tunngavigalugit iliuusissatut pilersaarutit suliarineqassapput, taamaalilluni Qeqqata Kommunia innuttaasunut sulisunullu suli nuannernerulersinniarlugu.

2010-p aallartisimalernerani Qeqqata Kommuniata pingaartitarpaaluit, tassa ulluinnarni sulinermi toqqammavissatut aalajangiiffigivai, taakkulu aamma siumut isigaluni kommunimik ineriartortitsinermi illup iluani avataanilumi atugassaallutik.