Polar Fish 2010

Aalisarneq pillugu saqqummersitsisarnituamut Polar Fish-imut ukioq manna Sisimiut kingumut aaqqissuisuuvoq. Saqqummersitsineq Sisimiut Timersortarfiani 2010-mi oktobarip 7-iani, 8-ni 9-anilu ingerlanneqassaaq
6. oktober 2010

Aalisarneq pillugu saqqummersitsisarnituamut Polar Fish-imut ukioq manna Sisimiut kingumut aaqqissuisuuvoq. Saqqummersitsineq Sisimiut Timersortarfiani 2010-mi oktobarip 7-iani, 8-ni 9-anilu ingerlanneqassaaq. Sisamanngornermi oktobarip 7-iani saqqummersitsineq Borgmester Hermann Berthelsen-imit nal. 10.00 ammarneqassaaq. Ammaanermi Aalisarnermut, Piniarnermut Nunalerinermullu Naalakkersuisoq Ane Hansen, saqqummersitsinermi illersuisuusoq aamma oqaaseqassaaq.

Timersortarfimmi saqqummersitsinermi nunanit avannarlernit tikillutik saqqummersitsiartortut 55-it saqqummersitsissapput. Sisimiuni 2008-mi kingullermik saqqummersitsisoqarmat iluatsilluartumik ingerlanneqarpoq, taamanilu 1446-it saqqummersitsinermut alakkarterillutik. Nunani avannarlerni aalisarnermik soqutigisallit Polar Fish naapisimaarfissatsialaraat.

Ammaffissat:

Polar Fish 2010-mi oktobarip 7-ianit 9-a tikillugu ammassaaq, ullunilu taakkunani pingasuni nal. 10.00-imiit 17.00 tikillugu ammasassalluni. Ullormut isissutissaq 100 koruuneqassaaq.

Saqqummersitsineq

Aalisarnermut piniarnermullu tunngassuteqartunik sunilluunniit Polar Fish saqqummersitsiviuvoq, aammali aalisartunut piniartunullu kiffartuussisut saqqummersitsinermi sinniisoqassapput. Saqqummersitsinermi aalisarnermik piniarnermillu annerusumik minnerusumilluunniit aallutaqartut saaffigineqarput.

Tullinnguuttuni nutaarsiassat saqqummersitsinermi ilaatigut takutinneqassapput:

amoorutit, sipilit

umiatsiaaqqioriaaseq

atortut

atisat

aalisarnermi piniarnermilu atortut

qalut qassutillu

kalerrisaarutit isumannaallisaanermilu atortut

motoorit

nillusaatit qerititsiviillu

naatsorsuutit, avammut nittarsaaneq, sillimmasiissutit siunnersuinerlu

allarpassuillu

Aalborg-imi Danfish International, Dansk Eksportforening, Qeqqata Kommunia aamma Qeqqata Inuutissarsiutitigut Siunnersuisooqatigiivisa suleqatiginerisigut saqqummersitsineq aaqqissuunneqarpoq. Tamatuma saniatigut Aalborg Kommune, Royal Arctic, GrønlandsBANKEN aamma TELE-POST suleqatigineqarput.