Qeqqata Kommuniata Sisimiuni umiarsualivik massakkut allilerusuppaa

Sisimiut Umiarsualiviata allilerneqarnissaanut aningaasartuutissat affaasa aningaasaliissutigineqarnissaanik aningaasaqarnermut ataatsimiititaliap innersuussutaa, Qeqqata Kommuniani Kommunalbestyrelsip marlunngorpat akuersissutigissallugu naatsorsuutigaa.
18. november 2010

Sisimiut Umiarsualiviata allilerneqarnissaanut aningaasartuutissat affaasa aningaasaliissutigineqarnissaanik aningaasaqarnermut ataatsimiititaliap innersuussutaa, Qeqqata Kommuniani Kommunalbestyrelsip marlunngorpat akuersissutigissallugu naatsorsuutigaa.

Kalaallit Nunaanni illoqarfiit annersaasa aappaattut umiarsualiveqarnikkut pisariaqartitsineq piumasaqaatillu naammassineqarnissaat pillugit Sisimiut Umiarsualiviata allilerneqarnissaanut pilersaarut ingerlariusissat immikkoortut pingasoqiusat aqqutigalugit ilaqqinneqarneratigut taama pisoqarpoq, taama borgmester Hermann Berthelsen oqarpoq.

Naak, Namminersorlutik Oqartussat umiarsualivimmik piginnittuugaluartut, pisariaqartitsinerlu naapertorlugu umiarsualiviup allilerneqarnissaanut nammineq aningaasaliisariaqaraluartut, kommuni utaqqeqqissinnaanngilaq. Taamaattumik umiarsualiviup tamakkiisumik ilaannakortumilluunniit kommunimut tunniunneqarnissaa utaqqiinnarnagu, umiarsualiviup allilerneqarnissaanut aningaasartuutissat affaasa akilerneqarnissaannik Qeqqata Kommuniata neqerooruteqarnissani naatsorsuutigaa.

Sisimiuni umiarsualiviup allilerneqarnissaa pingaartinneqarluni A/S Umimmak Traffic-imut niuernermik pilersaarut ukiut sisamat matuma siorna tamanut tusarliupparput. Tamatuma kingorna aningaasaleerusuttunit tusarluarnartumik neriorsuutinik tigusaqartarpugut, taamaakkaluartorli siunnersuummut Namminersorlutik Oqartussat suli isumminngillat.

Utaqqeqqissinnaanngilagut, taama Hermann Berthelsen oqarpoq. Taamaattumik allilerneqarnissaanut aningaasartuutissat affaasa akilerneqarnissaannik maannakkut siunnersuuteqarpugut. Kingusinnerusukkut kommunip piginneqataanissaanut tunngasut isumagineqarumaarput.

Aalisartut takornariaqarnermillu suliallit iluaqutserusullugit taamtut iliorpugut, kilisaatimmi umiarsuillu takornarissanik angallassisut talissinnaasariaqarput. Umiarsualiviup allilerneqarnissaanut 56,5 mio. koruuninik naleqarluni suliassap siulliup massakkut aallartinneqarnissaa Kalaallit Nunaani inuutissarsiutitigut ineriartornermut pingaaruteqarluinnarpoq, taama Hermann Berthelsen naggasiivoq.