Aningaasameertoqaraluarnerata_nalaani_Qeqqata_Kommuniani_akileraarutitigut_procenti

Aningaasameertoqaraluarnerata nalaani Qeqqata Kommuniani akileraarutiti­gut procenti, sanaartugassatigut missingersuutit annertussusiat meeqqerivinnilu akit appasinnerat taamaatiinnarneqassapput.
2. december 2010

Aningaasameertoqaraluarnerata nalaani Qeqqata Kommuniani akileraarutiti­gut procenti, sanaartugassatigut missingersuutit annertussusiat meeqqerivinnilu akit appasinnerat taamaatiinnarneqassapput.

Akileraarutitigut procenti, sanaartugassatigut missingersuutit annertussusiat meeqqerivin­nilu akit appasinnerat taamaatiinnarneqassapput
Marlunngornermi novembarip 23-ni 2010-mi ataatsimiinnermini akileraarutit 2011-mi 25 procenti­miitiinnarnissaat Qeqqata kommunalbestyrelsita akuersissutigimmagu borgmesterip Hermann Ber­thelsen-ip nuannaarutigivaa.
Peqatigitillugulu aalajangiunneqarluni, sanaartugassatigut missingersuutit annertussusiat meeqqeri­vinnilu akit appasissusiat aamma taamaatiinnarneqassasut, tamakkuummatami kommunalbestyrel­sip atuunnermini pingaartitamitut ilisarnaatigilersimasai.
Illuatungaatigulli kommunimi allatigut akiliutitigut 10 procentimik qaffaanissaq pisariaqarsimallu­ni, pingaartumik avatangiisinut pilersuinermullu tunngasutigut.

Suliffissat ikilipput
Aningaasameernerup kingunera aamma Qeqqata Kommuniata malugilersimavaa, tassa Namminer­sorlutik Oqartussani, Naalagaaffimmi namminersorlutillu inuutissarsiutilinni suliffiit matuneqarta­riaqalerlutik matusariaqalersimallutilluunniit. Soorlu Niaqunngunami olivinnimik piiaavik 2009-p naaneranut matusariaqarsimalluni, Sisimiuni erngup nukissiorfik 2010-p aallartisimalernerani naammassineqarpoq, Kangerlussuarmi efterskole 2010-p aasaanerani matuneqarluni, Kangerlus­suarmi pineqaatissitanut inissiisarfik 2010-p naaneranut matussaaq kiisalu Royal Greenland-ip su­liffissuaataa 2011-p aallartinnerani nutarterneranut atatillugu sulisuminik ikilisaasariaqassasoq, taamatut Hermann Berthelsen oqarpoq.

Isertitat annikinnerulersimapput
Suliffeqarfiit ikinnerulerneri soorunalimi akileraarutitigut isertitakinnerulernermik malitseqarput. Aammalumi Namminersorlutik Oqartussat tunngaveqarpianngitsumik ataatsimoortumik tapiissuti­tigut ikilisaallutik, taamaattumillu Qeqqata Kommuniani 2011-mi ukiunilu missiliuuteqarfiusuni isertitassat annertuumik appariaateqassallutik. ”Missingersuutitigut 41 mio. koruuninik amigaartoo­ruteqartoqassaaq, karsimiittuuteqarluarnerpulli tamatumani iluaqutaavoq”, Qeqqata Kommuniani borgmesteri paasissutissiivoq.

Procentinik tallimanik sipaaruteqarnissaq
Karsimiittuuteqarluarnerli taamaallaat 2011-p ingerlanerani iluaqutaassaaq, taamaattumillu ataatsi­miititaliat tamarmik piumaffigineqarlutik, ingerlatsinermik iluani procentinik tallimanik sipaarutis­sanik ukiup naannginneranut ujartueqqullugit siunnersuusioqqullugillu. Siunnersuutissat tamakku allaffissornikkut januaarimi misissorneqarnissaat naatsorsuutigineqarpoq, kommunalbestyrelsimilu inaarutaasumik februaarimi aalajangiiffigineqassallutik, taama Hermann Berthelsen nalunaarpoq. Kommunalbestyrelsip naatsorsuutigivaa, sipaarutissat tamakku sapinngisamik innuttaasunik eqquis­sanngitsut.