Qeqqata_Kommuniata_2011-miit_2014-mut_missingersuutai

Qeqqata kommunalbestyrelsiata aningaasarliornermik eqqugaagaluarluni kommunip ukiuani siullermi kommunip aqunneqarneratigut siunissami alimasissumi anguniagassai aalajangiusimaannarpai.
15. december 2010

Qeqqata kommunalbestyrelsiata aningaasarliornermik eqqugaagaluarluni kommunip ukiuani siullermi kommunip aqunneqarneratigut siunissami alimasissumi anguniagassai aalajangiusimaannarpai.

Qeqqata kommunalbestyrelsiata suli pingaartillugu aalajangiuppaa, ingerlatsinermut atatillugu aningaasaqarnikkut aqutsineq sukangasuumik ingerlanneqassasoq, taamaalilluni sanaartugassatut missingersuutinut ikkutat aningaasassaqaqqullugit, peqatigitillugulu akit appasitsinniassallugit pingaartumik meeqqeriveqarnerup tungaatigut.

Qeqqata kommunalbestyrelsiata aammattaaq pingaartippaa, kommunimi akileraarutip Kalaallit Nunaanni kommunit akornanni appasinnerpaaffissaaniitikkusullugu.

Quppernermi matumani takusinnaavatit, kommuni suminngaaniit annerpaamik isertitaqartarnersoq, qanorlu taakku atorneqartarnersut. Tamatuma saniatigut suut unamminartut aqqusaagassarigivut aamma takusinnaavat, akigititatigullu qanoq inissisimasoqarnersoq.
 

  

Qeqqata Kommunia aningaasarliornermik eqqugaa-voq:

Suliffissat ikilipput
Aningaasameernerup kingunera aamma Qeqqata Kommuniata malugilersimavaa, tassa Namminersorlutik Oqartussani, Naalagaaffimmi namminersorlutillu inuutissarsiutilinni suliffiit matuneqartariaqalerlutik matusariaqalersimallutilluunniit. Soorlu Niaqunngunami olivinnimik piiaavik 2009-p naaneranut matusariaqarsimalluni, Sisimiuni erngup nukissiorfik 2010-p aallartisimalernerani naammassineqarpoq, Kangerlussuarmi efterskole 2010-p aasaanerani matuneqarluni, Kangerlussuarmi pineqaatissitanut inissiisarfik 2010-p naaneranut matussaaq kiisalu Royal Greenland-ip suliffissuaataa 2011-p aallartinnerani nutarterneranut atatillugu sulisuminik ikilisaasariaqassasoq, taamatut Hermann Berthelsen oqarpoq.

Isertitat annikinnerulersimapput
Suliffeqarfiit ikinnerulerneri soorunalimi akileraarutitigut isertitakinnerulernermik malitseqarput. Aammalumi Namminersorlutik Oqartussat tunngaveqarpianngitsumik ataatsimoortumik tapiissutitigut ikilisaallutik, taamaattumillu Qeqqata Kommuniani 2011-mi ukiunilu missiliuuteqarfiusuni isertitassat annertuumik appariaateqassallutik. Missingersuutitigut 41 mio. koruuninik amigaartooruteqartoqassaaq, karsimiittuuteqarluarnerpulli tamatumani iluaqutaavoq.

Procentinik tallimanik sipaaruteqarnissaq
Karsimiittuuteqarluarnerli taamaallaat 2011-p ingerlanerani iluaqutaassaaq, taamaattumillu ataatsimiititaliat tamarmik piumaffigineqarlutik, ingerlatsinermik iluani procentinik tallimanik sipaarutissanik ukiup naannginneranut ujartueqqullugit siunnersuusioqqullugillu. Siunnersuutissat tamakku allaffissornikkut januaarimi misissorneqarnissaat naatsorsuutigineqarpoq, kommunalbestyrelsimilu inaarutaasumik februaarimi aalajangiiffigineqassallutik. Kommunalbestyrelsip naatsorsuutigivaa, sipaarutissat tamakku sapinngisamik innuttaasunik eqquissanngitsut.

Matuma ataani akit ilaat takuneqarsinnaapput.