Nuummiunut kisimi nunatsinnulluunniit tamarmut Naalakkersuisut sullissinerlutik

Qeqqata Kommuniani borgmesterip Hermann Berthelsenip, Naalakkersuisut Air Iceland-imik isumaqatigiissusiorsimammata tupigusuutigaa. Paasisakka naapertorlugit, Naalakkersuisut isumaqatigiissusiornermikkut nunap sinnerani timmisartukkut angallattut tunulliunnerisigut Nuummi sulisutik kisiisa salliutippaat.
21. januar 2011

Qeqqata Kommuniani borgmesterip Hermann Berthelsenip, Naalakkersuisut Air Iceland-imik isumaqatigiissusiorsimammata tupigusuutigaa. Paasisakka naapertorlugit, Naalakkersuisut isumaqatigiissusiornermikkut nunap sinnerani timmisartukkut angallattut tunulliunnerisigut Nuummi sulisutik kisiisa salliutippaat.

Akikilliissuteqartoqarnissaanik nutaamik isumaqatigiissusiortoqarneratigut Nuummi innuttaasut akikinnerusumik billitsisisinnaanngussasut qularnanngilaq, taamaaliortoqarneranili nunap sinneraniittut pilliutigineqarlutik. Air Iceland Reykjavik-mit aallaaveqarluni Nuummut angalasarpoq, taamaalilluni Kalaallit Nunaanut tuttussaagaluit pilotinut, timmisartuni saqisunut, mittarfinnut akitsuutit il.il. Rejkjavik-imut iluanaarutaassallutik, Hermann Berthelsen oqaaseqarpoq.

Tamatuma kingunerisaanik Mittarfeqarfiit Air Greenland-ilu isertitakinnerulissapput. Suliffeqarfiit taakku allatut ajornartumik nunatsinnut tamarmut eqquisussamik akinik qaffaasariaqarput. Taamaalillutik Naalakkersuisut Kalaallit Nunaat akigalugu Air Iceland-imik Reykjavik-imillu siuarsaapput. Tamannalu pakatsinartorujussuuvoq, Qeqqata Kommuniata borgmesteria isumaqarpoq.

Naalakkersuisulli nunatta sinneranit sanilliullugu Nuummik salliutitsisarnerat nutaarsiassaanngilaq. Angallannermut tunngasuni Nalakkersuisut Nuummiunik Københavnimeersunillu inuttalerlugu assartuussineq pillugu isumalioqatigiissitaliornikuupput. Ilimagaaralu, nunatsinni Reykjavik silaannakkut angallannermi qitiusoqarfittut inissinneqarnissaa siumut aalajangereerlugu innersuussisoqartoqarsimassasoq, soorlumi tamanna ilutigalugu Naalakkersuisoq Palle Christiansen Air Iceland-imik isumaqatigiissusiorsimasoq, Hermann Berthelsen oqarpoq.

Tassungalu assingusumik suliassaqarfiit assigiinngitsut kommuninut tunniussuunneqarnissaannik iluarsartuusseqqinnermi pilersaarutit, annerusumik minnerusumilluunniit unittooqqapput. Akileraartarnermut akiliisitsiniartarnermullu tunngasunik Nuummi eqiterussinermik nunarput suli eqqugaaqqavoq, taakkuninngalu ingerlatsineq kommuninit ingerlanneqarallarmat ingerlalluarnikuugaluartoq maanna annerusumik minnerusumilluunniit ajalusoorfiusimavoq.

Aammattaaq sanaartorneq Arktisk Kommando-millu suliniutit annertuut kiisalu matoqqasumik isertitsivik, nunatsinni allami pitsaanerusumik inissiisoqarsinnaanera Naalakkersuisut misissueqqaallannguaratik Nuummi inissippaat. Allarpassuarnillumi assersuutissaqarpoq, Hermann Berthelsen naggasiilluni oqarpoq.