Qeqqata Kommuniata alumiiniumik pilersaarusiaq annertusisarniarpaa

Qeqqata Kommuniata januaarip 1-ani 2011-mi sulisut marluk atorfinitsippai - Peter S. Olsen aamma Tønnes Berthelsen – alumiiniumik pilersaarut qanimut suleqatigiissutigalugu ingerlatsisussatut.
14. januar 2011

Qeqqata Kommuniata januaarip 1-ani 2011-mi sulisut marluk atorfinitsippai - Peter S. Olsen aamma Tønnes Berthelsen – alumiiniumik pilersaarut qanimut suleqatigiissutigalugu ingerlatsisussatut.

Peter S. Olsen alumiiniumik pilersaarusiornermi ataqatigiissarisussatut atorfinitsitaavoq, alumiiniumullu pilersaarusiamut tunngasutigut suliat ingerlanneqartorpaalussuit pingaarnertut ataqatigiissaassallugit. Tamatumani innuttaasut suleqatigiissitat suliaat pingaartillugit, taamaalilluni Maniitsumi innuttaasut alumiiniumik illoqarfimmilu pilersaarusiornermi sunniuteqaqataanissaat anguniarlugu. Taamaattumik Maniitsumi innuttaasut siunissami ulimiiniumik pilersaarummut tunngasutigut apeqqutissaqarunik Peter S. Olsen saaffigisassavaat.

Peter S. Olsen-illi aamma alumiiniumik pilersaarusiornermi inuutissarsiutilinnut allanullu avataani attavigisassanut soorlu Alcoa, Greenland Development aamma Kalaallit Nunaani Nmminersorlutik Oqartussanut ataqatigiissaarisuussaaq. Tamatumalu saniatigut nunarsuarmi allani alumiiniumik suliaqarfiusuni ilisimaarisanut misilittakkanullu tunngasut pingaarutillit, pingaartumillu illoqarfittut ikinngutitsinni Island-ip Kangiatungaani Fjaardal Kommune pisut siunissami sammineqarneri aamma annertusarneqassallutik. Peter S. Olsen ukiorpassuarni Nuummi KANUKOKA-mi kiisalu Namminersorlutik Oqartussani suliaqareersimalluni inunngorfimminut Maniitsumut uterpoq.

Tønnes Berthelsen pilersaarusiami siunnersortitut atorfinitsitaavoq, taamalu kommunimi pilersaarutit annertunerusut sammisarissallugit. Siullertullu alumminiumik pilersaarusiamut atatillugu illoqarfiup ineriartortinneqarnissaani pilersaarusiorneq sammissallugu, tamatumani kommunimi pilersaarusiap allanngortiternissaa ilanngullugu. Tamatumanilu Tønnes Berthelsen-ip inuutissarsiutitigut pisortatut Maniitsumilu innuttaasut Maniitsumi attaveqaatitigut suleqatigiiffiini aqutsisutullu sulisimanermini misilittakkani tunuliaqutigilluassavai.

Illoqarfiup ineriartortinneqarnissaanut atatillugu Tønnes Berthesen innuttaasut suleqatigiiffiisa kiisalu arkitektit 70°N-ip anguniagassatut siunniussaat ingerlateqqillugit suliassarissavai. Kommunip ukiumi kingulliunerusumi anguniagassatut siunniussat marluusut samminerusimavai, taamalu ilaatigut innuttaasut suleqatigiit anguniagaasa ilaat arfernik nasiffik piviusunngortissimallugu. 70°N-ikkut anguniagassatut siunnersuutaat eqqarsaatigalugit kommunip issittumi ingeniørinngorniatut suliffimmik misiliisoq Anders Vahlgren qaammatini kingulliunerusuni nutaamik illoqarfiliorsinnaanermi periarfissat iluatsittumik misissuiffigisimavai. Tønnes Berthelsen-illu suliaq taanna katersorlugu ataatsimoortumik pilersaarusiussallugu.