Kivitseqatigiilluni pillugu ataatsimiinneq iluatsitsiffiulluartoq

Kivitseqatigiilluni isumaginninnikkut akisussaaqataaneq pillugu suliassat paasissutissiissutiginiarlugit eqqartorniarlugillu, Qeqqata Kommunia 2011-mi arfininngornermi januaarip 22-ani Sisimiuni peqatigiiffinnik kattuffinnillu innuttaasut illuanni oqaloqatigiisitsilluni ataatsimiinnissamut aggersaavoq,
31. januar 2011

Kivitseqatigiilluni isumaginninnikkut akisussaaqataaneq pillugu suliassat paasissutissiissutiginiarlugit eqqartorniarlugillu, Qeqqata Kommunia 2011-mi arfininngornermi januaarip 22-ani Sisimiuni peqatigiiffinnik kattuffinnillu innuttaasut illuanni oqaloqatigiisitsilluni ataatsimiinnissamut aggersaavoq,

Isumaginninnikkut akisussaaneq kivitseqatigiissutigineqassasoq 2010-mi februaarimi nunatsinni borgmesterit sisamaasut aammalu Isumaginninnermut Naalakkersuisoq isumaqatigiissuteqarput,. Isumaqatigiissutip taassuma siunertarivaa, pisortani susassaqartut aammalu inuit nammineerisaminnik ingerlatsiniartut akornanni suleqatigiinnissamik ilusilersuinissamut atatillugu peqatigiiffiit kattuffiillu nammineq piumassutsiminnik ingerlasut akuutinneqarnissaat.  

Namminersorlutik Oqartussat kommunillu suliniuteqarfitik annertunerusumik ataqatigiissaartassagaat isumaqatigissutaavoq. Nuna tamakkerlugu kommunikkaartumillu politikkikkut suliniutinik suliniutinillu ataasiakkaanik pilersaarusiortoqarlunilu aallartitsisoqarpoq. 

Peqatigiiffinnit namminersortunit kattuffinniillu, tamatumani timersoqatigiiffiit, piniartut aalisartullu, qitittartut angajoqqaaqatigiillu aallartitaqarfigisaanni takkuttut amerlasimapput. Tamakku saniatigut ataatsimiinnermi ilaatigut peqataapput Borgmester Hermann Berthelsen, Ilinniartitaanermut, Kulturimut sunngiffimmullu ataatsimiititaliap siulittaasua Søren Alaufesen, Ilaqutariinnermut ataatsimiititaliap siulittaasuata tullia Alfred Olsen aamma Isumaginninnermut Naalakkersuisoqarfimmi pilersaarusiornermi aqutsisoq Dora Kleist.

Dora Kleist isumaqatigiissut pillugu oqaluttuarpoq, aammalu suliniutinik aallartinneqarsimasunik oqaluttualaarluni. Assersuutigiinnarlugu microfond-imik pilersitsisoqarsimavoq, taanna meeqqanut kisimiillutillu pilersuisuusunik suliniutinut minnerusunut peqatigiiffiit imaluunniit inuit nammineq suliniuteqartut aningaasanik qinnuteqarfigisinnaavaat. Microfond-i suliniutinut 10.000  koruunit – 20.000 koruunillu akornanni aningasartalinnut aningaasaliisinnaavoq. 

Piffissami aggersumi pinaveersaartitsinermut siunnersorti Arnaq Brønlund, illoqarfimmi inunnik namminneq suliniuteqartut peqatigiiffiillu pillugit paasissutissanik assigiinngitsunik katersuissaaq, ”Kivitseqatigiilluni” sulinerup ingerlaqqinnissaanut ilaasussamik. Arnaq Brønlund Sisimiuni pilersaarummut tamarmiusumt attaveqaataagallassaaq, taannalu una atorlugu E-mail: arnb@qeqqata.gl aamma oqarasuaat 86 66 46 / 58 58 94 atorlugit attavigineqarsinaavoq.