Innaallagissap akia paasiuminaatsumik qaffanneqartoq

Qeqqata Kommuniani Nukissiorfiit innaallagissap akianik qaffaanerat borgmesterip Hermann Berthelsen-ip eqqumiiginartippaa. Sisimiut illoqarfianni qaaffaaneq annerpaajuvoq, taannaallunilumi paasiuminaannerpaaq.
17. februar 2011

Qeqqata Kommuniani Nukissiorfiit innaallagissap akianik qaffaanerat borgmesterip Hermann Berthelsen-ip eqqumiiginartippaa. Sisimiut illoqarfianni qaaffaaneq annerpaajuvoq, taannaallunilumi paasiuminaannerpaaq.

Sisimiuni erngup nukissiorfittaaqqammerpugut, taamalu innuttaasut, suliffeqarfiit kommunilu akikinnerulersussamik neriuuteqarnikuugaluarput. Killulli tungerluinnaanik kWa-mut 96 oorinik qaffaaffigineqarlutik, tassa kWa-mut 2,06 koruuniniit./kWa-mut 3,02 koruuninut. Tassalu 47 procentinik qaffaaffiullutik. Tamanna akueriuminaappoq, Hermann Berthelsen oqarpoq.

Taamani Sisimiut Kommuneat januaarimi 2007-imi Nukissiorfinniit Namminersornerullutillu Oqartussaniit paasitinneqarpoq, siunissami erngup nukinga atorlugu nukissiamut akigititassaq kWa-mut 1,65 koruuniussasoq, tassa imermik nukissiorfiup naammassineraniit. Massakkulli erngup nukissiorfik naammassimmat, taavaana innaallagissap akia neriorsuutigisamiit marloriaatinngorsimaleqisoq.

Sisimiut saniatigut Tasiilaq aamma innaallagissap akiatigut annertuumik qaffaaffigineqarpoq, imalu eqqarsaqqajaanarsilluni, Ilulissani aamma erngup nukissiorfeqarlerunik taamatut pisoqassasoq. Tamanna innuttaasunut kusananngitsumik pissusilersorneruvoq, tassa erngup nukissiorfeqalernerup kinguneranik innaallagissamut akit annertuumik qaffariartariaqartassammata, taama isumaqarpoq Hermann Berthelsen.

Tamanna pillugu ullumikkut tamatumani Naalakkersuisumut akisussaasunut Jens B. Frederiksen-imut akissuteqarfigeqqullugu allagaqarpunga, tamatumunnga ilanngullugu aamma Maniitsumi 26 procentimik akinik qaffaanermik toqqammaviusut ilanngullugit. Soorunalimi taama annertutigisumik akinik qaffaaniarnermi toqqammavigisat kommunimut paasissutissiissutaasimanissaat naatsorsuutigisimagaluarparput, kisiannili Namminersorlutik Oqartussaniit sunnguamilluunniit Qeqqata Kommunia tusagaqarsimanngillaq, Hermann Berthelsen paasissutissiivoq.