Sisimiuni uulia pillugu isumasioqatigiissitsinissaq soqutigineqarluartoq

Sisimiuni apriilip 30-ini maajillu 1-ani issittumi uuliasiornerit pillugit saqqumiussisussat peqataarusuttullu soqutiginnilluarput. Isumasioqatigiissitsinissap aaqqissuunnera naammassingajalivipparput, Aatsitassarsiornermi Ilinniarfiup inspektøria, Hans Hinrichsen oqarpoq.
17. marts 2011

Sisimiuni apriilip 30-ini maajillu 1-ani issittumi uuliasiornerit pillugit saqqumiussisussat peqataarusuttullu soqutiginnilluarput. Isumasioqatigiissitsinissap aaqqissuunnera naammassingajalivipparput, Aatsitassarsiornermi Ilinniarfiup inspektøria, Hans Hinrichsen oqarpoq.

Saqqummiussisussat ilagivaat nunarsuarmi avatangiisit pillugit ilisimaarineqartut ilaat Golder’s-ip pisortaa Mark Musial Alaskameersoq peqataaniarpoq, tamatumanilu avatangiisit, isumannaallisaaneq kiisalu Alaska-mi uuliasiornermik aaqqissuussinerni misilittakkat oqaluttuarissallugit. Norge-p avannaarsuaniit Finnmark-imiit Lisbeth Sandtrøen saqqummiussisussani peqataassaaq, tassa kommunalbestyrelsimi ilaasortaq Finnmarkimilu tekniske skole-mi rektoriusoq, tassa qanoq Norge-p avannaarsuani aamma uuliamik gassimillu tunisassiortoqalersimanera pillugu, sutigullu Kalaallit Nunaata tamanna ilinniarfigisinnaanera. Norge-miit allat aamma saqqumiussissapput, ta¬matumanilu aamma Stavanger-imi misilittakkat ilanngullguti, Hans Hinrichsen taama nalunaarpoq.

Suli Kalaallit Nunatsinnut qaninnermiit Canada-miit Newfoundland-imi misilittakanik saqqumiussisoqassaaq. ARTEK/DTU-miit post doctoritut taaguutitaaqqammersoq Janne Fritt-Rasmussen Issittumi ulliasiornermi sillimaniarnermut uuliakoornermullu tunngasutigut ilisimatusarnerit nutaat pillugit saqqumiussissaaq. Tamatuma saniatigut Danmark-imi uuliamik nioqqutissiornermut Kalaallillu Nunaanni uuliasiornermut tunngasutigut arlalinnik saqqummiussisussanik peqataajartornianit nalunaartoqarnikuuvoq. Tamakkulu aamma ilagalugu ukiuni makkunani Kalaallit Nunaanni uuliamik misissiunermik suliaqartut Cairn, allallu uuliasiornikkut piginneqatigiiffiit tusarnaartuinnartut peqataaniarlutik.

Aamma Hans Hinrichsen-ip nuannaarutigivaa, Naalakkersuisut arlallit tamatumunnga tunngasutigut saqqummiussiniarmata. Taamaaliornikkullu isumasioqatigiinnerup siunertavia tikikkumaarparput, tassalu inuiaqatigiit ineriartortitaanerinut, ilinniartitaanermut, peqqinnissamut, isumannaallisaaneq, avatangiisinut attaveqarnermut aaqqissuussinernullu tunngasutigut issittumi nunai avannarliit kiisalu politikkerit uuliasiortullu akornanni misilittakkanik avitseqatigiissinnaaneq.

Kingullertut minnerunngitsumillu Newfoundland-imi Kalaallillu Nunaanni ilinniartitaanermut ministerit naapeqatigiinnissaminnut periarfissaqarluassallutik, tamatumanilu isumaqatigiissummik atsioqatigiissinnaanissaat neriunarluni, taamatut nalunaaruteqarpoq Aatsitassarsiornermik Ilinniarfimmi inspektøri, ilanngullugulu maluginiaqqullugu, isumasioqatigiinnissamut peqataaniarnermi suli nalunaaruteqarnissamut periarfissaqarmat ugguuna www.offshoregreenland.com