Canada-mi Nunavut-miit tikeraat

Sisamanngornermi marsip 31-ni tallimanngornermilu apriilip 1-ani cadamiut 68-it Sisimiunut tikeraarput, tamatumani Nunavut-mi naalakkersuisunut ilaasortat, Nunavut-mi kommuninit arlalinnit borgmesterit ilaallutik, kiisalu inuit inuutissarsiutitigut peqatigiiffeqarnertigullu nuimasut arlalissuit aamma peqataaffigisaannik.
5. april 2011

Sisamanngornermi marsip 31-ni tallimanngornermilu apriilip 1-ani cadamiut 68-it Sisimiunut tikeraarput, tamatumani Nunavut-mi naalakkersuisunut ilaasortat, Nunavut-mi kommuninit arlalinnit borgmesterit ilaallutik, kiisalu inuit inuutissarsiutitigut peqatigiiffeqarnertigullu nuimasut arlalissuit aamma peqataaffigisaannik.

Tamatut tikeraarnermut aatsitassarsiornikkut piginneqatigiiffiup Agnico-Eagle Mines Limited (AEM)-ip Nunavut-mi gultisiorfeqalernissamut atatillugu paasisassartiortitsinera tunngaviuvoq. Angalanermilu aatsitassarsiornikkut pilersaarusiornernik ilisimasaqarnerulernissaq siunertaalluni, tassa Nunavut-mi aatsitassarsiorfiliunnginnermi. Sisimiunullu tikeraarnermi ilinniartitaaneq kiisalu Aatsitassarsiornermi Ilinniarfiup alakkarnissaa pingaartinneqarnerullutik.

Angalasut Sisimiunut kinguaattuulaaraluarlutik tikereernerisigut, Aatsitassarsiornermi Ilinniarfik alakkarneqarpoq, tamatumanilu aatsitassarsiornermi sulisussat ilinniartitaanerat pingaartillugu qanoq aaqqissuussisimaneq qanimut takuneqarluni. Tamatuma malitsigisaanik Hotel Sisimiuni pisortatigoortumik nereqatigiittoqarpoq, kulturikkullu misigisassanik assigiinngitsunik takutitsisoqarluni, soorlu: erinarsoqatigiinnik, inuttut qitinnernik kiisalu qilaatersornermik, tassa Nunavut-miit Kalaallillu Nunaanniit takutitsisoqarluni.

Tallimanngornermi Qeqqata Kommunia sivisunngitsumik kommunimik ilisarititsinermut qaaqqusisuuvoq, tamatumalu malitsigisaanik illoqarfimmi takusassarsiortitsisoqarluni, tassa peqataasut timmisartumut ilaallutik uterlutik Canada-liannginnerini. Peqataasut Kalaallit Nunaannukannginnerminni Finland-imiissimapput, tassanilu aatsitassarsiorfiup piiaaviisa ilaat alakkarsimallugu.

Tikeraarnerlu aqqutigalugu Qeqqata Kommuniata, Nunavut aamma AEM-ip sinniisaanik qanimut attaveqarneq pilersinneqarluni.