Maannakkut aalajangiisoqartariaqalerpoq

Sermitsiaq nr. 19-imi maajip 13-ini 2011-mi atuartartumit ilanngutaq
Qeqqata Kommunia, SIK aamma Grønlands Arbejdsgiverforening nalornilersimapput Naalakkersuisut Alcoamut suliniut imaluunniit suliniutit angisuut allat nunatsinni piviusunngortinneqarnissaat pimoorullugu kissaatigineraat.

18. maj 2011

Sermitsiaq nr. 19-imi maajip 13-ini 2011-mi atuartartumit ilanngutaq
Qeqqata Kommunia, SIK aamma Grønlands Arbejdsgiverforening nalornilersimapput Naalakkersuisut Alcoamut suliniut imaluunniit suliniutit angisuut allat nunatsinni piviusunngortinneqarnissaat pimoorullugu kissaatigineraat.

Immaqa eqqumiiginarsinnaavoq pingasuulluta ataatsimoorussamik oqariartuuteqarnerput, allarpassuartigummi isumaqatigiinngissuteqartarpugut. Oqaatiginiarparpulli suliassaqarfiit isumaqatigiiffigisatta naammassineqarnissaat soqutigatsigu taamaalilluta akunnitsinni sulisoqarnermut attaveqarnermullu tunngasutigut isumaqatigiinngiffigisavut oqaluuserisinnaaniassagatsigik.

Ernumassugilersimavarput namminersorlutik oqartussat ajornartorsiutit  suliniutini taamaattuni aalajangiiffigineqartussat naammattumik ilisimasaqarfigineraat. Tassani sulisussat assigisaallu kisimik pineqanngillat. Aamma suliniutit pineqarput nunatsinnik nunallu immikkoortuinik suliffeqarfiit avataaneersut eqqaaniittunik allannguerujussuartussat.

Tupigisassaanngitsumik nalornisoqarnera paasilluarparput, nunatsinnimi taama annertutigisunik aalajangiisoqartarsimanngilaq. Taamaattumik qulakkiissallugu peqqutissaqarnerulerpoq suliamik aalajangiinissamut ilisimasaqarluarnissaq. Suliniutinut tunngatillugu aaqqissuussineq ilummut isigisutut, suliamut naammattumik ilisimasaqanngitsutut nunallu tamalaat akornanni sulinissamut misilittagaqanngitsutut misigaarput, tamannami pisariaqarpoq isumaqatigiinniarnerit pisariaqartut ingerlanneqarnissaannut. Nunatsinni suleqatigiissitat allaanngillat formel 1-mut qimussersunik ilaatitaqarneq, ikinngutinnersumik oqaatigissagaanni. Nunat tamat akornanni sulinissamut pikkorissut atorsinnaasavut suliniummi pissarsiarisariaqarpavut. Atorsinnaanngilaq nunaqqativut pingaartinniaannarlugit nukiit misilittagaqanngitsut nunatta oqaluttuarisaanerani aatsaat taama pingaartigisunik aalajangiinissamut sulisinnissaat, misissueqqissaarnerit imaluunniit isumaqatigiinniarnissat eqqarsaatigalugit.

Sulisussanik aaqqissuussinerup isumaqatigiinniartitassallu allanngortinneqarnissaat kissaatigaarput, taamaalilluta nunatsinni atorfilittat inunnik nunat tamat akornanni sulinissaminnut misilittagaqarluartunik immikkullu ilisimasalinnik suleqateqarlutik.

Qangalili naalakkersuinermik suliallit kalaallit piginneqataatinneqarnerannik takusaqarsimapput. Immaqa atorfilittat ikittuinnaat akornanni isuma taamaattoq suli tapersersorneqarpoq, ersarilluinnarporli suliniummut taama annertutigisumut nalorninartoqartigisumullu aningaasatigut peqataanissatsinnut akissaqanngitsugut. Piginnittuunissamut periusissaq maannagaaq qulaajarneqarli. Tamanna Alcoamut pingaartuusimappat isumaqarpugut suliniummut tassunga nukinnik atueqqinnissamut peqqutissaqanngitsoq.

Suliniummut tassunga allanullu suliniutinut tunngavissatut piumasaqaatit assigiinngitsut qulaajarneqartariaqarput. Uani taasinnaavagut sullivinni avatangiisit, sulisut nunanit allaneersut apeqqutillu allat.

Maannagaaq aalajangerneqarli Alcoap aatsitsiviliornissaanut allanullu suliniutissaarsuarnut immaqa takkuttussanut atugassarititaasut suunersut tamakkiisumik ilisimalernissaat. Ataasiakkaarluta aalajangiisariaqalinnginnissaq tassani pineqarpoq ilisimanagulu tamakkiisumik sunik inuiaqatigiinnut kinguneqassanersut.

Kingullertut minnerunngitsumilli: Qulaajarneqartariaqarpoq suliniut taanna kissaatigineripput, aammalu immitsinnut naalakkersuinermik suliaqarnerup avataani iluaniluunniit suliffissuaqarnikkut ineriartortitsinissaq nunatsinni pilersinneqartariaqarnersoq pillugu pisussaaffilerluta, siunissami atugarissaarneq qulakkeerlugulu pilersissagutsigu.

Inussiarnersumik inuulluaqqusilluta

Hermann Berthelsen, borgmesteri, Qeqqata Kommunia

Jess G. Berthelsen, SIK-mi siulittaasoq

Henrik Leth Grønlands Arbejdsgiverforeningimi pisortaq - www.ga.gl