Sisimiuni isikkamik arsarluni kalaallit nunaanni pissartanngorniunnermi ajugaaniutivinnissat qanilliartorput

Tallimanngornermi ualikkut arfininngornermilu ulloq naallugu, Sisimiuni illoqarfiup qeqqani arsaattarfimmi isikkamik arsarluni kalaallit nunaanni pissartanngorniunnermi unamminerit aalajangiisussat unammissutigineqalerpata nuannaarluni nilliarpalaartoqartassaaq, siggartartoqarluni biilillu siggartartarlutik. Arsaattarfik kaajallallugu eqqaanilu qaqqani isiginnaartut illersuillutik sapaatip akunnera tamaat illersuinikuupput. Ajugaaniutivinnissap tungaanut nuannaarnerit ingerlaannarnissaat qularnanngilaq, arfininngorpallu nal. 16.00 unammineq kingulleq aallartinneqassaallu.
19. august 2011

Isikkamik arsarluni Kalaallit Nunaanni pissartanngorniunnermi unamminerit siulliit naammasseriarpata, arfininngornermi ualikkut tungaanut tallimanngornermi arfiningornermilu inissinniunnerit ingerlanneqassaput. Kalaallit Nunaanni pissartanngorniunnernik GBU (Grønlands Boldspil union) aamma illoqarfitsinni SAK-p isikkamik arsarnermut immiikkoortua aaqqissuisuupput. Taakkuuppullu arfininngorpat ajugaaniutivinnerit ajugaasullu akissarsitinneqareerpata, peqataasunut aggersakkanullu nereqatigiinnissamut qaaqqusiisuusut. Nal. 22.00-miit 03.30 tungaanut timersortarfimmi tamanut ammasumik qititsitsisoqassaaq. Iserneq 50 koruuneqarpoq.

Isikkamik arsarluni Kalaallit Nunaanni pissartanngorniunnernut borgmesteri Hermann Berthelsen illersuisuuvoq, unamminermullu atatillugu aningaasartuutinut assigiinngitsunut Qeqqata Kommunia aningaasatigut tapiissuteqarnikuuvoq.

Katillugit arsaqatigiiaat qulit, sapaammi aggustip 14-ianiit arfininngornermi ajugaaniutivinnissap tungaanut unammisaqattaarnikuupput. Illoqarfitsinneersut SAK`p semifinalimi inissap aappaa Aasiammiunut tunniunneqartoq isiginnaaginnartariaqarsimavaa. Arsaqatigiiaat marluusut assigeeqqissaamik inississimapput, unammersuarnermilu peqataaqqinnissaat makitsinikkut aalajangerneqarpoq. Unamminissat sinnerinut pilersaarut uani takusinnaavat.