Kalaallit atisaat assigiinngitsuniit isigalugit

Sisimiut Katersugaasiviat oktobarimi immikkorluinnaq assiliisaqartarfiussaaq, tassa angutit arnallu atisaat Kalaallit Nunaannit tamaneersut assiliortorneqassammata.
11. oktober 2011

Piffissami qanittumi angerlarsimaffimmi qarasaasiakkut kalaallit atisaat sumiiffinni katersugaasiviit pigisaat assigiinngitsut assigiinngitsuniit (kajallallugit) isiginnaarneqarsinnaalissapput.



Kalaallit Nunaanni sumiiffinni katersugaasiviit piffissami qaangiuttumi atisaatitik nalinginnaanngitsut Sisimiut Katersugaasiviannut nassiussorsimavaat, atisallu tamakku 36-usut, Kalaallit Nunatta Avannaaneersut, Kitaaneersut, Kujataaneersut Tunumeersullu sumiiffimmeerneri immikkuullarissuusut, qaammammi matumani assiliortorneqassapput katersugaasivimmilu nalunaarsorneqassallutik.

Assiliisartoq Roberto Fortuna Katersugaasivissuup Eriagisassanik Brede-mi immikkoortortaaniit aggersuuvoq, assiliissullu immikkorluinnaq ittoq atorlugu atisat tamaasa ataasiakkaarlugit 24-inngorlugit assiliortussallugit. Atortorissaarut immikkut ittoq geni kavitittakkamut ikkuteriarlugu assiliiviup saavani kaviaartillugu assiliineq ingerlannneqassalluni. Suliani naammasseriarpagu assit qarasaasiakkut kaaviiaartillugit qimerloorneqarsinnaalissapput, taamalu atisat sammivinnit tamaniit isiginnaarneqarsinnaassallutik minnerpaartannguinut allaat.

Suliaq naammasseriarpat, assitai Sisimiut Katersugaasiviata quppersagaani/nittartagaani takuneqarsinnaalissapput, piffissamili aggersumi Qallunaat Nunaanni Katersugaasivissuarmi atisanik katersuiviannut atanilerneqassallutik, Nunani Avannarlerni pilersaarusiatut suliaasimasoq.

Kalaallit atisaannik assiliiortornissaq manna, tassa Kalaallit Nunaata kulturikkut oqaluttuarisaanerani nalilittut pingaaruteqartussaq, tamanit takuneqarsinnaasunngortinneqassaaq, Kalaallit Nunaanni katersugaasiviinaanngitsunit, soqutiginnittunilli Kalaallit Nunaata avataniittunut aamma.

Sisimiut Katersugaasivianni assiliiortornissamik pilersaarut Knud Højgaard Fond-imit aammalu Kalaallit Nunaanni Nordens Institut-imit annertoorujussuamik aningaasaliiffigineratigut assartuinermilu Royal Arctic Line-mit tapersersorneratigut pisinnaalersimavoq.