Sisimiuni nersornaasiineq Qeqqata Kommuniata borgmesterianit Hermann Berthelsenimit ingerlanneqarpoq

Susanne Lyberth Itillimi inunngorpoq 4. februar 1938 angajoqqaaralugit Kiistaaraq aamma Karl Lennert. Ilaqutariit 1942-mi Itillimiit...
Maannguaq Berthelsen Sisimiuni inunngorpoq 12. december 1936 angajoqqaaralugit Sofie aamma Henrik Berthelsen...

21. december 2011

 

Susanne Lyberth pillugu ima oqaaseqarpoq.

 

Susanne Lyberth Itillimi inunngorpoq 4. februar 1938 angajoqqaaralugit Kiistaaraq aamma Karl Lennert. Ilaqutariit 1942-mi Itillimiit Sisimiunut nuupput.
Susannep angajoqqaavi marluullutik 1944-mi qaammatip ataatsip ingerlanerani toqukkut qimagup­put, taamaalillutillu qatanngutigiit sisamaasut ilaquttaminnik paarineqalerput.

 

Susanne Lyberth uinilu Jens Frederik Lyberth 1957-imi katipput.
Ukiullu ingerlanerini arfineq marlunnik meerartaarput.
Susanne Lyberth-ip peqatigiiffilerineq soqutigisaasa pingaarutillit ilagaat. Taamaasilluni 1970-ikkut ingerlaneranni GAS/SIP–mi aningaaserisutut sulivoq.
Susanne Inuusuttuunerminit ilaatigut fabrikkimi, ungdomspensionimi meeqqerivimmilu sulisima­voq.

 

Susanne 1976-imiit 1984 ilanngullugu Sisimiuni atuartut angerlarsimaffianni kollegiani sulivoq. Kollegiani sulinermini inuusuttuararpassuit oqaluttuuttarpai inuunermi akisussaaffiit suunerinit pingaassusianillu. Tamaallu pineqarnertik inuunerminni iluaqutigilluarpaat massakkut suli eqqaamasaqarfigalugu.

 

Ukiorlu 1984-imi utoqqaat angerlarsimaffianni sulisaler­poq suliunnaarnissami tungaanut.

 

Susanne Lyberth utoqqalereeraluarluni peqatigiiffik IKIOQATIGIIFFIK suli ingerlappaa. Taamaa­lilluni ukiuni 24-ini suleqataaffigaa 1991-imiillu maannamut suli siulittaasutut sulilluni. Sisimiuni Ikioqatigiiffik pitsaasumik innuttaasu­nullu iluaqutaalluarluni ingerlasoq. Sisimiormiorpassuit toqukkut qimagaasimasut Ikioqatigiiffik iluaqutigilluartarpaat.

Maannguaq Berthelsen pillugu ima oqaaseqarpoq

 

Maannguaq Berthelsen Sisimiuni inunngorpoq 12. december 1936 angajoqqaaralugit Sofie aamma Henrik Berthelsen.
Maannguaq suli naartuusoq ataataa Hendrik september 1936-imi toquvoq.
Maannguaq apersorteriiginnarluni 1950-imi qalipaasutut sulillunilu ilinnialerpoq 1959-imilu naammassilluni svendeprøveqalerluni allagartartaarpoq.

 

1963-imi qalipaasoq alla peqatigalugu namminersortutut ingerlalerput. Taamanikkut illut Tattoqeqarfimmi sanaartorlugit ingerlatinneqaleruttorput.
1966-imi Maannguaq napparsimmavimmi portøritut qalipaasuutigaluni 1976-p tungaanut suliler­poq.
Maannguaq Berthelsen 1976-imiit 2000-imut Sisimiut umiarsualivimmi ukiuni 25-ngajanni sulivoq.
Maannguaq aamma Gerda Berthelsen 1960-imi katipput ukiullu ingerlanerini tallimanik meerar­taarput massakkullu qulinik ernutaqarlutik aammalu marlunnik ernutaqqiuteqarlutik.

 

1990–imi Gerda napparsimalermat Maannguup ulloq unnuarlu paaqqutarisarpaa 2011 tikillugu. Maannguup nuliaminut paaqqutarinnilluarnera innuttaasunit amerlasuunit assut maluginiarneqartar­poq nersortariaqartutullu isigineqarluni.
Maannguaq GAS/SIP-imi ukiuni arlalinni suleqataavoq ataqqinaammillu ilaasortaalluni. Maan­nguaq SIP sinniisaatut Sanaartornermi ilinniarfimmi brancheudvalgitut ukiut arlallit ilaasortaavoq.
Maannguaq aamma ukiuni arlalinni timersoqatigiiffimmi SAK-imi suleqataavoq.

 

Johanne Zethsen pillugu ima oqaaseqarpoq

 

Johanne Zethsen (Arnaaraq) Attumi inunngorpoq 24. april 1940 angajoqqaaralugit Andrea aamma Anthon Brandt.
1948-mi ilaqutariit tamarmiullutik Sisimiunut nuupput. Sisimiunut nuunnerminni Arnaaqqap atuarnini atuarfitoqqami ingerlappaa kingusinnerusukkullu Minngortuunnguup Atuarfia atulermat atuarfigilerlugu.
Arnaaraq apersortereerami siullermik Palasikkunni kiffaavoq ukiullu ingerlanerani allani aamma sulisarluni.

 

Johanne aamma Terkel Zethsen 1958-imi katipput ukiullu ingerlanerini pingasunik meerartaarput. Arnaaqqakkut Qullissani najugaqarput ukiuni marlussunni. Tassani Tikkili Qaarusummi mekanikeritut sulimmat. Ukiullu marlussuit Qullissaneereeramik ilaqutariit 1961-mi Sisimiunut nuupput, tassani Tikkili GTO-mi mekanikeritut sulilerluni.
1974-imi Tikkili napparsimalerpoq Arnaaqqallu qasusuilluni uini paaqqutarisarpaa 2000-imi toquk­kut qimagunnissaa tikillugu.

 

Arnaaraq inoqatiminut asannittuugami assigiinngitsutigut inoqamminut ikiuukkumaatuujuvoq, Arnaaraq 1979-imiit 2003-mut Knud Rasmussenip Højskoliani sulivoq.
Arnaaraq erinarsornermik soqutigisaqartuugami Sisimiuni erinarsoqatigiinnut 1962-imili ilaalerpoq ”Erinaq”-llu pilersinneqarmat ilaasortaalerluni kingusinnerusukkullu erinarsoqatigiit ”Noqarteq” ilaaffigilerlugu. Maannamullu suli erinarsoqataasarpoq.

 

 

 

Nersornaasernerqartut Susanne Lyberth, Maannguaq Berthelsen, Johanne Zethsen aamma borgmesteri Hermann Berthelsen

 

 

Susanne Lyberth

 

 

Maannguaq Berthelsen

 

Johanne Zethsen