Maniitsumi_alumiiniumik_pilersaarusiaq_soqutigineqarluartoq

Sisamanngornermi februaarip 2-ani 2012-mi Maniitsumi alumiiniumik pilersaarusiap innuttaasunut saqqummiunnerani soqutiginnillutik najuuttut 150-it missaaniipput. Maniitsumi innuttaasut suleqatigiissitaat, Inatsisartut Inuutissarsiornermut ataatsimiititaliaat, Inuutissarsiornermut Aatsitassanullu Naalakkersuisoq Ove Karl Berthelsen, sumiiffimmi politikerit soqutiginnittullu allat illoqarfimmi ataatsimoorlutik alumiiniumik pilersaarut oqallisigivaat.
7. februar 2012

Sisamanngornermi februaarip 2-ani 2012-mi Maniitsumi alumiiniumik pilersaarusiap innuttaasunut saqqummiunnerani soqutiginnillutik najuuttut 150-it missaaniipput. Maniitsumi innuttaasut suleqatigiissitaat, Inatsisartut Inuutissarsiornermut ataatsimiititaliaat, Inuutissarsiornermut Aatsitassanullu Naalakkersuisoq Ove Karl Berthelsen, sumiiffimmi politikerit soqutiginnittullu allat illoqarfimmi ataatsimoorlutik alumiiniumik pilersaarut oqallisigivaat.

Maniitsumi innuttaasut suleqatigiissitaat, Kalaallit Nunaanni alumiiniumik aatsiteriffeqalernissamut akerliusut kiisalu Aatsitsivik Soqutigaarput atuartullu atuaqatigiit ataatsit Island-ip kangianiatungaani Fjardarbyggd-imi alumiiniumik aatsiteriffimmut takusassarsiornerminni misigisimasatik takusatillu oqaluttuarivaat, tassa 2011-mi tikeraarnerminniit. Atuartut misigisimasaminnik takusaminnillu saqqummiussaat pingaartumik soqutigineqarpoq, atuartullumi saqqumiussinerat tusarnaartuniit ersaartaatsingaatsiarput.
Maniitsumi alumiiniumik pilersaarutip oqaluttuarinerata saniatigut, Inuutissarsiornermut aatsitassanullu Naalakkersuisup Ove Karl Berthelsen-ip aamma Kalaallit Nunaanni aatsitassanik atuisinnaanikkut misissuinerit saqqummiuppai. Ilaatigut Kalaallit Nunaata Avannaatungaani Maarmorilimmilu aqerloq zinkilu oqaluttuaralugit, Nuummi Isukasiata eqqaani saviminissaq, Qeqertarsuatsiaat eqqaanni aligoq aappaluttoq, Kuannersuarni Kringlerne-lu ujaqqat qaqutigoortut taamatullu Nalunami Tunumilu kuulti.
Unillatsiareernerup kingorna Inatsisartut Inuutissarsiornermut ataatsimiititaliaata, Naalakkersuisup Ove Karl Berthelsen-ip, Qeqqata Kommuniata borgmesteriata Hermann Berthelsen-ip borgmesterillu tulliata siulliup Karl Lyberth tusarnaartuniit apeqqutit oqaaseqaatillu piumassuseqarluartumik akissuteqarfigisarpaat.

Pingaartumik Inuutissarsiornermut Aatsitassanullu Naalakkersuisoq apeqquteqarfigineqarluarluni. Tamatumanilu ilaatigut saqqummerluni, Kalaallit Nunaata Alcoallu akornanni piginneqatigiinnissamut atatillugu akuersissuteqarnikkut piginneqatigiinneq Naalakkersuisut innersuussutiginartikkaat, upernaamut Inatsisartut ataatsimiinissaannut atatillugu. Taamatuttaaq nunanit allaneersut sulisorineqarsinnaanerinut tunngasut aamma upernaamut ataatsimiinnissami eqqartorneqartussaallutik. Ove Karl Berthelsen-ip neriuutigivaa, upernaamut Inatsisartuni ataatsimiinnissami saqqumiukkusutat tamarmik naammassineqarsinnaanissaat, taamaalilluni ALCOA-p ingerlaqqeriarnissaa oqaluuserineqarniassammat.
Qeqqata Kommuniata alumiiniumik pilersaarummut atatillugu ukiorpaalunngortuni pingasoqiusaalluni isumaqatigiissuteqarnissaq kissaatigisarivaa. Sisamanngornermi Ove Karl Berthelsen-ip kommuni nuannaajallatsissippaa, tassa oqaatigiamiuk Qeqqata Kommunia pingasoqiusamik Namminersorlutik Oqartussat ALCOA-lu isumaqatigiissuteqarnissamut peqatigisinnaanerat periarfissinneqartoq. Tamatumanili apeqqutaalissaaq, upernaamut ataatsimiinneranni ALCOA-mik isumaqatigiinniarnerit ingerlaqqinnissaannut Inatsisartut akuersaarnissaat.

Maniitsumi Innuttaasunik suleqatigiissitat siulittaasuat, Jaakutoqaq Heilmann ataatsimiititsinerup kingorna oqarpoq:
- Innuttaasunik ataatsimiititsineq peqataaffigilluarneqarpoq, aammalu Island-imut angalasimanermiit kiisalu Naalakkersuisup Ove Karl Berthelsen-ip saqqummiussereernerisigut oqallittoqarluarnera tulluusimaarnartoq. Alumiiniumik pilersaarut pillugu soqutiginnillutik kajumillutillu peqataasut tamaasa qutsavigerusuppakka. Neriuutigaaralu tamatta ataatsimiititsineq pissarsiffigilluarsimassagipput.

Paasissutissat allat
Apeqquteqarniaraanni Maniitsumi Innuttaasut suleqatigiissitat siulittaasuat, Jaakutoqaq Heilmann oqarasuaammut angallattakkamut 52 17 54 attavigineqarsinnaavoq.