Kommunip_pilersaarusiorneqarnera_digitaaliusoq_pillugu_Maniitsumi_oqallissaarut

Marlunngornermi maajip 22-ani Maniitsup Katersortarfiani Qeqqata Kommuniata digitaaliusumik pilersaarusiorneqarneranut tunngatillugu innutaasunik ataatsimiititsisoqarpoq. Kommunip pilersaarusiorneqarnera pillugu politikkerinut kiisalu innutaasut suleqatigiissitaannut oqalliseqatigiinnissannut innuttaasut 50-it missaaniittut soqutiginnillutik najuupput.
29. maj 2012
Marlunngornermi maajip 22-ani Maniitsup Katersortarfiani Qeqqata Kommuniata digitaaliusumik pilersaarusiorneqarneranut tunngatillugu innutaasunik ataatsimiititsisoqarpoq. Kommunip pilersaarusiorneqarnera pillugu politikkerinut kiisalu innutaasut suleqatigiissitaannut oqalliseqatigiinnissannut innuttaasut 50-it missaaniittut soqutiginnillutik najuupput.

Borgmesteri Hermann Berthelsen ataatsimiinnermi aallarniisoralugu, politikkerit assigiinngitsut oqallissaarutinik saqqumiussipput. Ilatigut saqqummiunneqarlutik Maniitsup Kommuniani umiarsualiveqarnermi pissutsit, ujaqqerivissaq, kiisalu ineqarfinnut tunngasut. Taamatuttaaq naluttarfissaq, naatitsivissaq kiisalu najugaqarfissat heliportitoqqami inissinneqarsinnaanerannut pilersaarut saqqummiunneqarpoq, kiisalu nunaannaap sumut atorneqarsinnaanera eqqartorneqarluni.

Tamatuma kingorna Maniitsumi innutaasut suleqatigiissitaata suliniuteqartui pingasuusut illoqarfiup kusassarneqarnissaanut, atortulersuutit kulturikkullu suliniutit pillugit takorluukkaminnik saqummiussipput. Innuttaasut suleqatigiissitaata suliniutigileriigaasa ilagivaat illoqarfimmi aqquserngit aqqisa ilisarnaatilersornissaut. Aqqusernit taaguusersorneqarnissaasa saniatigut, suna pillugu aqquserngit taamatut taaguuserneqarsimanerisa oqaluttuassartaa kalaallisut qallunaatullu allanneqarsimasunik nalunaarsorneqarsimapput. Maniitsumi aqquserngit allagartassaat naammassineqalereerput, ungasinngitsumilu ikkussuunneqartussaallutik. Innutaasut Kommunillu ikiuinerisigut suliniutit ilaasa piviusunngortikkiartuaarnissaat, innutaasut suleqatigiissitaanit neriuutigineqarpoq.

Ataatsimiinerup immikkoortuata aappaani nerriviit sisamanngorlugit avinneqarput, tassanilu Kommunip pilersaarusiorneqarneranut, kiisalu innuttaasut suliqatigissitaata suliai pillugit ataatsimut isummersuutiminnik oqaasissaminnillu annissuinissaminnut periarfissinneqarlutik. Naluttarfissap kiisalu naatitsivissap pilersaarusiorneqarnera, aammalu sumut inissinneqarnissaat soqutigineqarluarlutik eqqartorneqarput. Unnuup ingerlanerata naajartornerani, nuanneqisumik oqallissimaneq ataatsimut eqikkarlugu kommunalbestyrelsimut saqqummiunneqarpoq. 

Borgmester Hermann Berthelsen-imit ataatsimiinneq naammagisimaarluarneqarpoq. -Kommunimi suliarineqartut pillugit innuttaasut eqqarsaataat tusassallugit nuannertuaannarpoq. Kommunip pilersaarusiorneqarnera illoqarfitsinnut aammalu nunaqarfiit ineriartortinneqarnissaannut, innutaasullu ulluinnarni inuunerannut annertuumik sunniuteqartussaavoq. Taamaattumik aamma siunissami kommunip isikkussaa eqqarsaatigalugu, innutaasut isumaannik tusagaqassalluni pingaaruteqarluarpoq. Sisimiuni Maniitsumilu innutaasunik ataatsimiititsinerup takutippaa, sutigut nikeriartoqarsimaneranik innutaasut soqutiginninnerat.

Politikkerit kiisalu innuttaasut suleqatigiissitaata saqqumiinnerat Akisuasup Tusaataatigut toqqaannartumik aallakaatinneqarpoq.
Kommunip pilersaarusiorneqarnera digitaaliusoq, 2012-imi aggustip aallaqqaataata tungaanut tusarniutigineqarpoq.