Tusagassiutitgut_nalunaarut_Suliassat_annertuut_pillugit_nalunaarusiaq_Qeqqata_Kommuniata_tapersersorpaa

Alumiiniumik pilersaaruteqarnermi sulisussat nunanit allaneersut nunat tamat akornanni akissarsiat aallaavigalugit atorneqarnissaannik eqqarsaatersuut tapersersorniarlugu, Qeqqata kommunalbestyrelsia juunimili 2011-mi aalajangiivoq. Massakkullu Naalakkersuisut suliassat annertuut pillugit nalunaarusiami isuma taanna aamma tapersersormassuk nuannaajallannarpoq, borgmesteri Hermann Berthelsen taamatut oqarpoq. Neriunarporlu Inartsisartuni partiit tamarmiullutik tamanna tapersersussagaat, Qeqqata kommunalbestyrelsiani isumaqatigiinnertuulli.
21. maj 2012

Alumiiniumik pilersaaruteqarnermi sulisussat nunanit allaneersut nunat tamat akornanni akissarsiat aallaavigalugit atorneqarnissaannik eqqarsaatersuut tapersersorniarlugu, Qeqqata kommunalbestyrelsia juunimili 2011-mi aalajangiivoq. Massakkullu Naalakkersuisut suliassat annertuut pillugit nalunaarusiami isuma taanna aamma tapersersormassuk nuannaajallannarpoq, borgmesteri Hermann Berthelsen taamatut oqarpoq. Neriunarporlu Inartsisartuni partiit tamarmiullutik tamanna tapersersussagaat, Qeqqata kommunalbestyrelsiani isumaqatigiinnertuulli.

Nunani allani akissarsiat allaavigalugit sulisussat nunanit allaneersut islandimi erngup nukissiorfiliornermi atorneqarput, taassumalu Alcoap Islandip Kangiani alumiiniumik aatsiteriffiutaa nukimmik pilersugaralugu. Kalaallit Nunaanni aamma taamatut iliortoqarsinnaasariaqarpoq. Taamaaliunngikkuttami pilersaarutini taamaattuni nunanut eqqaamiutsinnut unammillernikkut angummassinnaannavianngilavut, Hermann Berthelsen-ip erseqqissarpaa.

Qeqqata Kommuniani Aatsitassanut Attaveqaqatigiinnermullu ataatsimiititaliap siulittaasuata Karl Lyberth aamma alumiiniumik pilersaarusiap suliassat annertuut pillugit nalunaarusiamut ilanngunneqarsimanera nuannaarutigivaa. Ajoraluartumik Alcoap Kalaallillu Nunaata akornanni isumaqatigiissutissaqarpugut suli naammassineqanngitsunik, tamakkuli saqqummernerat ajunngiitsuuvoq, taamaalilluta nunatut qanoq iliuuseqarsinnaassaavut, Karl Lyberth oqarpoq.

Pingaartumik akileraarutinut tunngasortai ajornakusooruteqarunarput. Nunat eqqaamiutta tamarmik alumiiniumik suliffissuaqarnerit akileraarutitigut pitsaasumik atugassaqartinniarsarivaat, minnerpaamillu aatsitassat eqqarsaatigalugit pitsaanerungaartunik. Ajoraluartumilli tamanna Kalaallit Nunaaanni killormut isikkoqarluni, aatsitassanimmi suliffissuit alumiiniumik pilersaarummut sanilliullugit akileraarutitigut pitsaanerusumik atugassaqartinniarpavut. Tamanna allanngortittariaqarpoq, tassa alumiiniumik pilersaarut piviusunngortissagutsigu, Karl Lyberth paasissutissiivoq.

Qeqqata kommunalbestyrelsiata isumaqatigiissutigivaa, alumiiniumik pilersaarut tassaammat suliassaq annertooq immikkut ittuusoq. Tamatumanilu patsisissat pingasuullutik:
1. nukiit piujuaannartussat atorlugit erngup nukissiorfeqalissaaq
2. suliffissanik ataavartussanik pilersitsiviussaaq
3. illoqarfimmi pioreersumi inissinneqassaaq

Qeqqata kommunalbestyrelsiata qilanaarivaa, Kalaallit Nunaanni Namminersorlutik Oqartussat suliassat annertuut pillugit nalunaarusiaq aallaavigalugu alumiiniumik pilersaarutip piviusunngortinnissaanut qanoq iliuuseqarnissaat. Neriunarsinnaavorlumi ukiamut ataatsimiinnissami aalajangiivinnissat piumaartut, Hermann Berthelsen aamma Karl Lyberth naggasiipput.