Tusagassiutitigut_nalunaarut_Ernummatissaqarani_perusuersartarfimmiinneq

Perusuersartarfiit nutaat marluk pilersinneqanerisigut Sisimiut timaatungaanni avatangiisinut akornutissaanngitsumik perusuersarsinnaalertoqarpoq.
Perusuersartarfiit nutaat Sisimiut timaatungaanni Kangerdluarssuk Tugdleq Narsarluunniit isikkiviliullugit perusuersarnermi, perusuersarsinnaaneq allatorluinnaq pisinnaalissaaq. Perusuersartarfiimmi avatangiisinut mingutsitsisuusussaanngimmata.

25. maj 2012

Perusuersartarfiit nutaat marluk pilersinneqanerisigut Sisimiut timaatungaanni avatangiisinut akornutissaanngitsumik perusuersarsinnaalertoqarpoq.

Perusuersartarfiit nutaat Sisimiut timaatungaanni Kangerdluarssuk Tugdleq Narsarluunniit isikkiviliullugit perusuersarnermi, perusuersarsinnaaneq allatorluinnaq pisinnaalissaaq. Perusuersartarfiimmi avatangiisinut mingutsitsisuusussaanngimmata.

Perusuersartarfiit imatut sanaajupput, annitat saanngutinnguuttussallutik. Perusuersartarfiit ataanni annitat narpatamut katersuugaassapput. Nappartaq ulikkaarpat matuneqassaaq, imaalu ukiup ataatsip ingerlanerani naggorissaatissiaralugit. Tamatuma kingorna saanngutitut nunamut siaruarterneqarsinnaassallutik.
Tamatuma kinguneranik, perusuersartarfiit imarisaat kommunimit illoqarfimmut assartortariaarutissapput. Tamatumanilu aningaasartuutit qamuteralunnullu ikummatissat sipaaruteqarfiussallutik.

Siunissami Sisimiut timaatungaaanni peruauersartarfiit saanguutiliuutit
Taamatut isumassarsiaq Island-imiit pisuuvoq, tassa nunap qattunersaani perusuersartarfiit taamaattut atugaagamik. Tamaani aasaq sivikitsuummat naggorissaasiorsinnaaneq siunnerfiusimavoq, taamaalillutik annitat 50 procentinik inikinnerulertarmata.
Kangerluarsuk Tullermi Narsamilu perusuersartarfiit saniaitigut, Kangerluarsuk Tulliup qinnguani illuaraq kommunip iluarsartuuppaa, ilaatigut taamaattumik perusuersartarfilerlugu.
Perusuersartarfiit saannguutiliorfiusussat taakku pingasut Arctic Circle Trail-ip aqqutaani illuaqqani, tassa Sisimiut Kangerlussuullu akornatigut pisuinnaat aqqutaanni, taamatut perusuersartarfilersuinissami alloriarnerusussapput siulliit – tamatumani apeqqutaaginnassalluni, taakku siulliit pingasut iluatsissanersut.

Siammasissumik suleqatigiinneq ilisimasanillu avitseqatigiinneq
Perusuersartarfiit titartagartaat aamma kommunip Island-imiit pissarsiarivai. Sanaartornermik Ilinniarfimmi ilinniarnermut atatillugu EUD-imik immikkoortortaata perusuersartarfiit sanavaat, Sisimiunilu sannaviup illersugaasup, Pisoq, toqqavissat suliarisimallugit illuaqqallu nunap timaaliaallugit toqqavissaanut ikkusuussimallugit.

Taamaattumik perusuersartarfiliat annertuumik Sisimiuni Sanaartornermik Ilinniarfiup, ARKTEK-ip, Norge-mi Ås-imi Universitetet for miljø- og biovitenskap-ip, Island-imi takornariaqarnikkut Island-ip Kangiani peqatigiiffiup Fljótsdalshérað, Qeqqata Kommuniata, kiisalu Island-imi Norge-milu suleqatigisat allarpaaluit akornanni suleqatigiinerisigut, perusuersartarfiit piviusunngortitaapput.

Suleqatigiinneq NORA-p pilersaarusiorneratigut tapersersugaapput (Nordisk Atlantsamarbejde), tamatumanilu professor Arne Villumsen kiisalu ph.d.-studerende Ragnhildur Gunnarsdóttir ARTEK-imiit siuttuullutik. Pilersaarusiami ilisimaarisat nunat peqataasunit tamaniit tunniussaapput, Island-imilu misilittakkat aallavigalugit toqqaasoqarluni. Tamakku Kalaallit Nunaata silaanaanut sivikitsumik aasaasartumut tulluartuupput, pingaaruteqarsimasorlu aasap sivikissusia atorlugu naggorissaasiorsinnaanissaq.

Teknikkimut Avatangiisinullu siulittaasup, Hans Frederik Olsen, pilersaarusiaq torrallataanerarpaa:
- Saannguutit atorlugit perusuersartarfiliornissaq pitsaasumik siunertalimmik iliorneruvoq. Uagut kommunitut timitsinni illuaqqat pitsaasuunissaannut akisussaasuuvugut, tamaanilu avatangiisitigut aamma akisussaaffeqarluta. Taamatullu perusuersartarfiliortitsinissatsigut akisussaanerput naamassiniarlugulu isumaqarpunga ajunngitsumik iliuuseqarfigalugu.

Hans Frederik Olsen aamma isumaqarpoq, kommunip peqataasimasut tamaasa annertuumik qujassutissaqarfigigai.
- Kommunitsinni atuarfeqarfiit suliffeqarfiillu akimoortumik suleqatigiisinnaamata nuannaarutigaara. Sanaartornermik Ilinniarfik, ARTEK aammalu Pisoq pilersaarummi nukippassuarnik atuisimapput, naammassisaallu imminermi takutitsilluartuulluni.

Paasissutissat annertunerusut
Perusuersartarfiit suleqatigiissimanerlu pillugit paasissutissanik annertunerusumik pissarsiniaruit kommunimi ingerlatsinikkut pisortap, Jacob Lundgaard tlf. 52 57 80 saaffiginissaamut tikilluaqqusaavutit.