Sisimiuni meeqqerivittaassap nappaanersiorneqarnera

Sisimiuni Kussangasuni meeqqerivissaq tallimanngornermi juunip aallaqqaataani nappaanersiorneqarpoq. Politikerit, kommunimit sinniisut, sanaartortitsisut, meeqqerivissamilu pisortassat nappaanersiornermi peqataapput.
11. juni 2012

Sisimiuni Kussangasuni meeqqerivissaq tallimanngornermi juunip aallaqqaataani nappaanersiorneqarpoq. Politikerit, kommunimit sinniisut, sanaartortitsisut, meeqqerivissamilu pisortassat nappaanersiornermi peqataapput.

Meeqqerivittaassaq naammassineqarpat, maannakkut meeqqeriviit Âjo Mikisoq-llu nuussapput. Meeqqerivittaassaq 2013-imi januaarip aallaqqaataata missaani nuuffigineqarsinnaassasoq neriuutigineqarsimagaluarpoq, sanaartornermili kinguaattoorneq patsisaalluni aatsaat 2013-imi maajip aallaqqaataata missaani nuuffigineqarsinnaanngussalluni.

Meeqqerivittaassaq akuleriissitsilluni meeqqeriviussalluni init marluk meeraaqqeriviussapput, marlullu meeqqeriviussallutik. Katillugit meeqqanut 64-inut inissaqartitsissaaq. Taamaalilluni meeqqeriviit taakku marluk nuuttussat katillugit meeraatigisinnaasaat qulinik ilaneqassapput.

Innarluutilinnut naleqqussagaq 
Meeqqerivittaassap isaariaa innarluutilinnut naleqqussagaassaaq, soorluttaaq innarluutilinnut perusuersartarfeqassasoq. Taamatuttaaq meeqqerivissaq pinnguartarfissaalu innarluutilinnit sulisunilluunniit kaassuartakkanik atuisunit tikikkuminarsisinniarlugit majorallaffiliisoqassaaq.

Sanaartorneq nangillugu meeqqerivissap ilua iikkersorneqarlunilu silataa qallersorneqassaaq. Tamatuma saniatigut innaallagisserisut ruujorilerisullu suliassatik aallartissavaat.

Annertunerusumik paasissutissat
Meeqqerivittaassaq pillugu annertunerusumik paasissutissat immikkoortortaqarfimmi pisortamut Niels Mønsted-imut, oqarasuaat 86 74 71-imut (sanaartornermut tunngatillugu) imaluunniit meeqqeriviit pisortaannut Grethe Kreutzmann-imut, oqarasuaat 86 74 04-imut saaffiginnissuteqarnikkut pissariarineqarsinnaapput.