Tusagassiutitigut nalunaarut: Kangerlussuarmi annerpaamik upalunaarsimaneq

Ulluni kingullerni Kangerlussuarmi kuup qassutsinera annertuumik kinguneqarmat, Ineqarnermut, Attaveqarnermut Angallannermullu Naalakkersuisoq Jens B. Frederiksen iluarsartuussinissamut Qeqqata Kommuniata ikiortiseraa.
12. juli 2012

Ulluni kingullerni Kangerlussuarmi kuup qassutsinera annertuumik kinguneqarmat, Ineqarnermut, Attaveqarnermut Angallannermullu Naalakkersuisoq Jens B. Frederiksen iluarsartuussinissamut Qeqqata Kommuniata ikiortiseraa.

Pisoq qanoq iluarsiivigineqassanersoq, sisamanngormat ullaap tungaani nunaqarfimmi aqutsisut eqqartorpaat. Tamatumani ilaatigut Namminersorlutik Oqartussat aningaasaqarnikkut sulisoqarnikkullu piaartumik ikiorsiinissaat kissaatigalugu attavigineqassasut aalajangerneqarpoq.
Tamatuma saniatigut kommunip kaammattuutigaa, suliamut attuumassuteqartut tamaasa sinniisulerlugit aqutsisoqatigiinnik piaartumik pilersitsisoqassasoq. Siunissaq qaninnerusoq eqqarsaatigalugu ajoqusersimasut iluarsartuunneqarnissaat, siunissarlu ungasinnerusoq eqqarsaatigalugu kuup qarsutseqqaratarsinnaanissaanut isumannaallisaanissaq aqutsisoqatigiinni ilaatigut eqqartorneqarsinnaavoq.

Qeqqata Kommuniani Borgmester Hermann Berthelsen-ip pisoq pinngortitami ajunaarnersuartut isigaa.
- Kangerlussuami ilungersunartorsiorpugut. Arlalippassuarnit suliniarfigineqarsimalereerpoq, sulinerinullu immikkut ittumik nersualaarneqartariaqarlutik. Taamaakkaluartoq tamakkiisumik iluarsiivigineqarnissaanut ikiuuttussanik suli amigaateqarpugut. Qaammaterpaalunni sulisut, pilersuinerit aningaasallu amerlanerusut pisariaqartinneqassapput. Suliassamut tamatumunnga GLV kisiat suleqatigalugu kommunip kisimiilluni nammassinnaanngilaa. Taamaattumik ullumikkut Jens B. Frederiksen saaffigaarput, taama Hermann Berthelsen oqarpoq.

Qarsutsinikkut ikaartarfiup aqquserngullu aserornerisa kingunerisaanik kuup kujataatungaanniittut eqqaavissuaq, ”Restaurant Roklubben” mittarfiullu radaria tikinneqarsinnaanngillat. Tamatuma saniatigut erngup innaallagissallu aqqutaat ajoqusissagaluarpata, Kangerlussuarmi radarimut imermik innaallagissamillu pilersuisoqarsinnaajunnaassaaq.

Annertunerusumik paasissutissat
Kangerlussuarmi pisoq pillugu annertunerusumik paasissutissat pissarsiariniarukkit, Fritz Baumann Petersen, oqarasuaat 53 18 59-imut attavigiuk.