Tusagassiutitigut nalunaarut: Maniitsumi utoqqarnut inissiat nutaat nappaanersiorneqarnerat

Tallimanngornermi septembarip 21-ani, Maniitsumi kommunit utoqqarnut inissiaataat nutaat 16-it nappaanersiorneqassapput.
Utoqqarnut inissiat ilaat juullertinnagu naammassineqassapput, kingulliillu ukiup nutaap aallartisimalernerani naammassineqassallutik.

20. september 2012
Tallimanngornermi septembarip 21-ani, Maniitsumi kommunit utoqqarnut inissiaataat nutaat 16-it nappaanersiorneqassapput.
Utoqqarnut inissiat ilaat juullertinnagu naammassineqassapput, kingulliillu ukiup nutaap aallartisimalernerani naammassineqassallutik. 

Inissisimalluartut 
Utoqqarnut inissiat taakku 16-it, marlunnik initaqarlutik 60 m2-it missaanik angitigipput. Sanaartukkat quleriiunngillat, isaarissallu portunersartaqaratik. Inissiat Tunoqqusaap Annertusuullu akornanni kangerliumanerup tungaanut sammiveqarlutik inissisimapput. Najugaqartut assersuutigalugu umiatsiaaqqatit najugarisami ungasinngisaani pituttorsinnaavaat. Bruseneeraq inissiat akianiippoq, pisiniarfiullu akianiilluni utoqqaat illuat Neriusaaq. Taamaattumik najugaqartut aamma pisiniarfilerissagunik ungasissuliartariaqanngillat, pisariaqartitsiffimminnilu Neriusaami ulluunerani neqeroorutigineqartunik atuisinaallutik.

Pilersaarutip sivisuumik ingerlanneqarsimasup naammassineqarnera 
Ukiut qulit missaat qaangiupput inissiat taakku pilersaarutigineqarmata, aatsaalli massakkut Namminersorlutik Oqartussat aningaasaleeqataanissaat anguneqarsinnaasimalluni. Siunissami Nunatsinni utoqqaat amerliartuinnartussaapput, taamaattumillu utoqqarnut inissianik amerlanerusunik sanaartortoqartariaqarneq Akileraartarneq atugarissaarnerlu pillugit Isumalioqatigiissitap taakkartornikuullugu. Namminersorlutik Oqartussat Utoqqarnut periusissaq pillugu siunnersuutaanni maannakkut tusarniutigisaminni, Nunatsinni utoqqarnut inissiat amerlanerunissaannik pisariaqartitsineq aamma taakkartorneqarpoq.

Sanaartortitsisup qujassuteqarluni oqalugiutissaa, kommunimi Ilaqutariinnermut Ataatsimiititaliap siulittaasuata Bitten Heilmann-ip saqqummiutissavaa. Inissiat nutaat atulerneqarnissaat qilanaaraa: 
-Qeqqata Kommuniani utoqqarnut politikkitsinni pingaaruteqartutut pingaartinnikuuvarput, sapinngisamik sivisunerpaamik utoqqartatta namminerisamik illuminni/najukkaminni najugaqartarnissaat. Taamaattumik illoqarfinni utoqqarnut inissiat amerlineqarnissaat Kommunalbestyrelsimi kissaatigaarput. Pingaartumik Maniitsumi utoqqarnut inissiat amigaatigaagut. Maannakkut utoqqarnut inissiat 14-iinnaaput, utoqqarpassuillu inissiani pitsorluttunut naleqqutinngitsuni najugallit arlaqarlutik. Taamaattumik utoqqarnut inissiat nutaat aamma ullutsinni siunissamilu inissianik amerlanerusunik atorfissaqartitsinissamut tapertaalluassapput. Ullutsinni maani kommunitsinni atuilluartuunissaq eqqartorneqarluartillugu, inuunerput naatserlugu pitsaasumik atugaqarluta inuunissatta qulakkeerneqarnissaa aamma pingaaruteqarpoq. Assersuutigalugu utoqqartatta namminerisamik iniminni sapinngisamik pisinnaanerini nammineersinnaanissaannut ikiornerisigut tamanna angusinnaavarput, taama Bitten Heilmann oqarpoq. 

Annertunerusumik paasissutissat 
Utoqqarnut inissiat nutaat pillugit annertunerusumik paasissutissanik pissarserusukkuit, Maniitsumi Ilaqutariinnermut pisortaq Svend Erik Rasmussen, oqarasuaat 81 78 53-imut attavigiuk.