Tusagassiutitigut nalunaarut: Sisimiuni misigisaqarfissaq nutaaq

Marlunngornermi oktobarip 30-ni Nutaaliorfiup – Kalaallit Nunaanni nutaaliornikkut qitiusup, akuleri-sitsilluni teknikkimut tunngasutigut misigisaqarfissatut, ilinniarfissatut ilinniaqqiffissatullu periarfissamut matuni ammatinniarpai.
29. oktober 2012

Nutaaliorfiup aallaqqaammut ilinniartitsivissani takussutissiissutiginiakkani nutaaq ammarniarpaa, tassalu uuliamut gassimullu tunngatinneqartoq. Sisimiuni Atuarfinni atuartut angajulliit kiisalu Sanaartornermik Ilinniarfimmi ilinniarnertuunngorniat siullersaallutik qitiusumi periarfissanik misiliitinneqassapput. Ilaatigut apeqqutit assigiinngitsut Ipad atorlugu akissutissarsiussavaat, aammalu Sisimiuni qatserisartut uuliamik mangaannartitamik assiaqutsersuineq atorlugu katersuinernik takutsitsinissaat isiginnaassallugu. Uuliaanngilarli tamalugassalliuku popcornit uuliaasuussaartillugit umiarsualivimmut kuisat.

Marlupqeqqanut qitiusumik ilinniartitsivissaq pisortatigoortumik ammarneqassaaq, tamatumanilu Qeqqata Kommuniata borgmesteria Hermann Berthelsen aammalu Kuno Fencker Cairn Energy-meersoq oqaaseqassallutik.

Marlunngornerup unnukkuani qitiusumik ilinniarfimmi innuttaasunik ataatsimiititsinissamut soqutiginnittut tikilluaqqusaassapput, tamatumanilu ilinniartut ullormut misigisimasaminnik oqaluttuassallutik, innuttaasullu qitiusumik ilinniarfissap ingerlanissaanut isummersuisinnaassallutik.

Kommunip atuilluartuunissamik pilersaarutaasa ilagiinnarpaat
Qeqqata Kommuniata borgmesteria Hermann Berthelsen, qitiusumik ilinniarfissamik isumassarsisuuvoq, tamatumani Danfoss Universe kiisalu København-imi Experimentariet isumassarsiffigisimallugit.
- Taamatut nutaamik qitiusumik misigisaqarfissarsinitsigut pisinnaasatigut ineriartortitsisoqarnissaa neriuutigilluinnarparput, tamannalu aqqutigalugu teknikkikkut siuariartuutinik ilisimasaqarnerulernissarput ilanngullugu, tamannami Kalaallit Nunaata nutaaliaasup pisariaqartippaa, atorfissaqartillugulu. Sapinngisamik siammasissumik atuisoqarnissaa anguniartariaqarpoq. Meeqqat atuarfiini atuartut Ilinniarnertuunngorniallu, assassornermik ilinniartut ilinniaqqittullu sinnerfissaqqittuupput. Taamaattorli isumaqarpugut, assersuutigalugu takornarissat takuniaasarnissaat ammaffigisariaqartoq, tamatumanilu takullugu, siunissami teknikkikkut atortorissaarutissat issittumi qanoq atorneqarsinnaanissaat, Hermann Berthelsen oqarpoq.

Nutaaliorfimmi siulersuisut siulittaasuat Arne Villumsen pilersaarummi pisortaavoq, Qeqqata Kommu-niani auilluartuunissamik pilersaarutit ilagisaanni.
- Marlunngornermi ilinniagassap siulliup atoqqaartinnissaa, qujanartumik Cairn Energy´s ilinniartitaanermut aningaasaateqarfiata tunissuteqarneratigut pisinnaalersimavoq. Taamaalilluta arlaati-gut aalajangersimasumik toqqammavilimmik misiliisinnaalerpugut, tassalu issittumi uulia gassi.
Alimasinnerusoq isigalugu qitiusumik misigisaqarfissami periarfissarpassuupput. Illut piusut iluarsartuunnissaat, tamatumani ussissaasarneq ilanngullugu, atortussat kiisalu oquup ajornartorsiutaanera, kiisalu nukiit piujuarsinnaasut atorlugit nukissiorneq siunissami sammineqarsinnaasussat ilagiinnarpaat. Teknikkikkut aaqqiissutaasinnaasut ineriartortinneqarnissaat ingerlateqqinneqarnissaallu sam-misassat soqutiginartut sammineqartariaqartullu ilagaat, kommunimi Kalaallillumi Nunaanni tamani assigiinngitsorpassuarnit sammisuusut, tamannalu nuannaarutigeqaara, Arne Villumsen oqarpoq.

Kalaallit Nunaanni qitiusutut Nutaaliorfik – sanaartorneq-, nukissiorneq- avatangiisit aatsitassallu piginneqatigiiffiuvoq, Kalaallit Nunaanni amutsiviit siullersaanni, Sisimiuni umiarsualivimmi taamatulli ullumikkut atorunnaarsimasumiippoq. Illorsuup initaa angisooq issittumi teknikkikkut aaqqiissutaasinaasutigut saqqumersitsinernut atugaasimavoq, tassanilu aamma assigiinngitsutigut ilinniaqqitsitsinerit ingerlanneqarsimallutik.

Annertunerusumik paasissutissat
Ammaanissamut atatillugu Nutaaliorfillu pillugu annertunerusumik paasissutissat Arne Villumsen oqarasuaat (+45) 20 95 70 77 atorlugu piniarneqarsinnaapput.