Eqqakkat puui Sisimiuni imakinnerulersimapput

Qillertuusanut igalaaminernullu eqqaaviit illoqarfimmi ukioq kingulleq juunimi atulerneqarput. Innuttaasunit containerit atorluarneqarsimapput, ullumikkullu innuttaasut amerlasuut igalaamerngit qillertuusakullu ikiorartuarsinnarpaat, angerlarsimaffinni eqqaavinnut ikiorarnagit. Tamannalu assut pitsaasumik kinguneqarsimavoq, tassa illoqarfimmi eqqaasunut ikuallaavimmullu.
22. januar 2013

Qillertuusanut igalaaminernullu eqqaaviit illoqarfimmi ukioq kingulleq juunimi atulerneqarput. Innuttaasunit containerit atorluarneqarsimapput, ullumikkullu innuttaasut amerlasuut igalaamerngit qillertuusakullu ikiorartuarsinnarpaat, angerlarsimaffinni eqqaavinnut ikiorarnagit. Tamannalu assut pitsaasumik kinguneqarsimavoq, tassa illoqarfimmi eqqaasunut ikuallaavimmullu.

Containerit atuuffiini qaammatini siullerni arfineq-pingasuni igalaamerngit 45 m3-terit missaat qillertuusakullu singartillugit naqitat 5 m3-terit missaat taakkununnga katersorneqarsimapput. Tamakkulu annertoqaat, taamalu Sisimiuni eqqaavilerisut malugilluarsimaqaat, angerlarsimaffinniit igitat puuisa oqinnerungaatsialernerisigut. Ikuallaaviullu ikumatinniarnera pitsaanerulersimalluni, taamalu ikuallaavimmi alumiiniu aattoorut ajornartorsiutaavallaarunnaarsimalluni. Tamatumalu aamma kinguneralugu 2007-ip kingorna aatsaat taama annertutigisumik kissamik pilersitsisinnaasimalluni.



Teknikkimut Aavatangiisinullu ataatsimiititaliap siulittaasuata Hans Frederik Olsen pitsaasumik eqqakkanik immikkoortiterisinnaanerup kingunerisinnaasaa ersareqimmat nuannaarutigivaa.

- Taamatut igitassanik immikkoortiterineq piffissaajaataalaarsinnaasarpoq, nuannaarutissaagisariaqarporli innuttaasut taama amerlatigisut peqataasimammata. Tamatumuuna aamma takussutissinneqarpoq, avatangiiserput ataasiakkaarluta akisussaaqataaffigalugu misigisimagutta, tamanna annertoqisumik kinguneqarsinnaavoq. Tamannalu tulluusimaarutigeqaara oqarlunilu, aammalumi Sisimiormiuusugut tamatta tulluusimaarutissaraarput. Kajumissaarutigiinnarsinnaavaralu, suli containerit atorluassagivut - tullianillu igitsiartulernitsinni eqqaamiorput igalaaminikunik qillertuusakunillu igitsiartoqatigiumallugu.



Tamatuma saniatigut qilanaarivaa, eqqagassalerinikkut siunissami iliuusissat taamatulli ilassilluarneqartigiumaartut.

- Eqqakkanut containerit igitassanik immikkoortitereriaasissami aallarniutaaginnarput. Naggataatigullu oqarluni, taamaammat neriuutigilluinnarpara, innuttaasut siunissami iliuusissatigut taamatulli tigusilluarumaartut.

Igitassanut containerit Sisimiuni ornigarneqarluartuni inissitaapput. Sisimiuni eqqagassanik

Immikkoortiterisarnerup sammineqarnerunera
 pillugu quppersakkami annertunerusumik atuarsinnaavat

Paasissutissat annertunerusut

Eqqakkanut containerit pillugit annertunerusumik paasisaqarusukkuit Sisimiuni ingerlatsinermi pisortaq Jacob S. Lundgaard, oqarasuaat. 52 57 80, attavigisinnaavat.