Tusagassiutitigut nalunaarut: Atulluartuunissamik pilersaarut pillugu Maniitsumi oqaluffitoqqami tamanut ammasumik aaqqissuussineq

Sisamanngornermi januaarip 24-ani nal. 11.00-imiit 18.00-ip tungaanut Maniitsumi innuttaasut Maniitsumi oqaluffitoqqamut aggersarneqarput. Aaqqissuussineq nuannersumik pisortatigoortuunngitsumillu ingerlanneqassaaq.
23. januar 2013
Sisamanngornermi januaarip 24-ani nal. 11.00-imiit 18.00-ip tungaanut Maniitsumi innuttaasut Maniitsumi oqaluffitoqqamut aggersarneqarput. Aaqqissuussineq nuannersumik pisortatigoortuunngitsumillu ingerlanneqassaaq. Innuttaasut soqutiginnittut ilaatigut makku pillugit paasisaqarsinnaapput:

·         Pilersitsivik, inuusuttunik sulinermissanik ilinnialernissamillu ingerlariaqqinnissaannut ikiuisartoq

·         Qeqqussat, qeqqussat panertitat nerisassiornermi avammullu tunineqarsinnaanerinik periarfissanik ujartuineq

·         Pitsaanerusumik eqqagassalerineq, imikumik katersuiveqarneq pigeriikkatsinnillu nukinneq atuineq

Kingullertut minnerunngitsumillu kommuni 2020-mi atuilluartuunissamik anguniagaa pillugu innuttaasut annertunerusumik paasisaqarusukkut aggerlutik paasisaqarnerusinnaapput.

Nalinginnaasumik innuttaasunik ataatsimiisitsinerunngitsumut kikkut tamat peqataanissaminnut tikilluaqqusaapput. Qanoq ililluta pitsaanerusumik inuiaqatigiinngorsinnaanersugut, siunissamilu qanoq ililluta atuilluartunngorsinnaanerput pillugu nerrivinni innuttaasut, kommunillu allaffianit pilersaarummut peqataasut sulisullu imminnut isummersoqatigiinnissaminnut periarfissaqarput.

Maniitsumi Ilaqutariinnermut Immikkoortortami pisortaq Svend Erik Rasmussen oqarpoq: ”Aaqqissuussinerup ingerlanneqarnissaanut qilanaarpugut, pilersaarutitsinnullu tunngatillugu innuttaasut isumassarsiaasa tusarnissaat qilanaaralutigu. Pilersaarummi pineqartut peqataatinneqarnerunissaat, atuilluartuunissamik pilersaarummut tunngatillugu anguniakkatta ilagaat, tassaasut: Innuttaasut. Oqartoqarsinnaavoq; Innuttaasoqanngippat atuilluartuusoqarsinnaanngilaq. Innuttaasut siunnersuutaasa isumassarsiaasalu nangillugit suliarinissaat qilanaaraarput, piviusunngortinneqarnissaallu sulissutigissallutigu”.

Qeqqata kommunia 2020-mi atuilluartuunissaminik anguniagaanut tunngatillugu innuttaasut peqataatinneqarnissaannut aaqqissuussineq tunngavoq.

Aaqqissuussineq pillugu annerusumik paasisaqarusukkuit tullinnguuttumut saaffiginnissuteqarsinnaavutit:

Svend Erik Rasmussen, Ilaqutariinnermut pisortaq, oqarasuaat 817853, mail: sera@qeqqata.gl