Tusagassiutitigut nalunaarut: Qeqqata Kommunia Sisimiuni atoqqinneqarsinnaasunik tunniussisarfimmik ammaalerpoq

Qulequtaata ataani: Nalaasaarfik suli atorneqarsinnaasoq iginniarpiuk? Qeqqata Kommuniani atoqqinneqarsinnaasunik tunniussisarfik siulleq Sisimiuni ammarneqalerpoq.
30. januar 2013

Qulequtaata ataani: Nalaasaarfik suli atorneqarsinnaasoq iginniarpiuk? Qeqqata Kommuniani atoqqinneqarsinnaasunik tunniussisarfik siulleq Sisimiuni ammarneqalerpoq.



Kikkulluunnit siunissami pequtinik, iggavimmi atortunik, sanaartornermi atortunik allanilluunniit suli atoqqinneqarsinnaasunik tunniussiartorsinnaalissapput. Atoqqinneqarsinnaasunik tunniussisarfik februaarip aallaqqaataani nal. 8:00 ammarneqassaaq, innuttaasullu siulliit qulit atoqqinneqarsinnaasunik tunniussisut akissarsitinneqassallutik. Innuttaasut kikkulluunniit, atoqqinneqarsinnaasunik tunniussisarfimmi amigaatiminnik pissarsisinnaanerlutik alakkarterinissaminnut tikilluaqqusaapput.



Kommunimi Teknikkimut Avatangiisinullu ataatsimiititaliap siulittaasua Hans Frederik Olsen, ammaanissamut qilanaarpoq:

- Atoqqinneqarsinnaasunik tunniussisarfiup ammarneqarneratigut, kommunip 2020-mi atuilluartuunissamik takorluuineranut attuumassuteqarpoq. Atoqqinneqarsinnaasunik atuisarnikkut ikuallaaviup sapinngisamik imminut akilersinnaasumik atorneqarnissaa aallaaviuvoq, taamaalilluni atoqqinneqarsinnaanngitsuinnaat kisiisa ikuallanneqartalissallutik. Tamatuma saniatigut aamma eqqaamassavarput, atoqqiisalernikkut pisattanik allanillu ungasissumiit nukinnillu atuisuusumik assartuisarneq annikillisissinnaagatsigu. Atoqqinneqarsinnaasunik tunniussisarfeqalernitsigut atuilluartuunerup tungaanut qanilliallannissarput neriuutigaara, taama Hans Frederik Olsen oqarpoq.



Atoqqinneqarsinnaasunik tunniussisarfeqarfilli aamma inooqataanermut attuumassuteqarpoq, taama erseqqissaavoq.

- Innuttaasut tamagimmik akisussaassuseqarnissaannut aamma tunngavoq, soorluttaaq aningaasaqarnikkut imminut artukkinngikkaluarluni pequtitaarnissamut imaluunniit meeqqanut pinngussanik pissarsinissamut atoqqinneqarsinnaasunik tunniussisarfik periarfissaasoq. Taamaattumik atuilluartuunissap qanoq siammasissinnaatigineranut, atoqqinneqarsinnaasunik tunniussisarfik assersuutissaqqippoq, taama siulittaasoq oqarpoq.



Atoqqinneqarsinnaasunik tunniussarfik nutaaq, Sisimiuni ikuallaaviup tigooraaviata eqqaaniippoq. Atoqqinneqarsinnaasunik tunniussisarfiup ammarneqarneranut atatillugu eqqagassanik avatangiisinut ulorianarsinnaasunut tunniussisarfik aamma ajornannginnerulissaaq. Atoqqinneqarsinnaasunik tunniussisarfik ulluinnarni nal. 08:00-imiit 16:00-ip tungaanut ammasassaaq. Suliffeqarfiit atoqqinneqarsinnaasunik tunniussinermikkut, ikuallaavimmut akiliutigineqartartoq sipaarutigisassavaat.

Atoqqinneqarsinnaasut atoqqinneqarsinnaasunik tunniussarfimmukaassinnaanngikkaanni, aaneqarnissaat pillugu kommunip eqqagassanik annertuunik aallertartui attavigineqarsinnaapput.



Paasissutissat annertunerusut

Ingerlatsinermi pisortaq Jacob S. Lundgaard, oqarasuaat 52 57 80.