Innuttaasut auilluartuunissamik siunertaannut tapiissutit

Qeqqata Kommuniata nutaami atuilluartuunissamik pilersaarummini agguataagassatut pilersaarutai aappassaanik agguaanneqaqqarmerput, tassa taamatut kommuni 2020-imi Atuilluartuuffiusussaq pilersinneqarmat atuutsilertinneqartut.
18. juni 2013

Qeqqata Kommuniata nutaami atuilluartuunissamik pilersaarummini agguataagassatut pilersaarutai aappassaanik agguaanneqaqqarmerput, tassa taamatut kommuni 2020-imi Atuilluartuuffiusussaq pilersinneqarmat atuutsilertinneqartut.

Massakkut pilersaarutit tallimat tapiiffigineqarput, tassa atuilluartuunissamik isummat assigiinngeqisunuusut iluini soorlu Sisimiuni Nereqatigiissitsineq, Meeqqat Inuusuttullu Sarfannguani Itillimilu ataatsimoortillugit erinarsoqatigiissinnissaannut, taamatullu Kangaamiuni meeqqanik inuusuttunillu sunngiffimmi assigiinngitsutigut susassaqartitsiniarnernut.

Pilersaarutinut tallimanut ataatsimut katillugit 75.000 koruunit kommunimiit tapiissutigineqarput.

Atuilluartuunissamik agguataagassat siunertarivaat, innuttaasut innuttaaqatiminnut iluaqu-taasussatigut namminneq kajumissutsiminnik iliuuseqarusullutik aallartinniagaat tapersersussallugit.

- Qeqqata Kommuniata atuilluartuuffiulernissaanik suliniutini innuttaasut namminneq ka-jumissutsiminnik suliniuteqarniarneri akuutitsiniarnerilu pingaaruteqarluinnartuupput. Taamaattumik innuttaasut akornanni atuilluartuunissamik eqqarsartaatsip taamatut uummaaritsiginera takullugu assut nuannaajallannartuuvoq, borgmesteri Hermann Berthelsen oqarpoq.

Atuilluartuunissamik agguaatassat iluaqutaanerat, massakkut Sisimiuni atuarfinni meeqqerivinnilu malunniutereerpoq. 2012-ip ukiassaani kommuni ilaatigut aasaanerani assigiinngitsunik naatitsiviliornissamut atuilluartuunissamik pilersaarutinut aningaasaliissuteqarpoq.

Taakkulu Sanaartornermik Ilinniarfimmi sanasutut ilinniartunit sanaartorneqarput, upernaallu ingerlanerani meeqqeriviit, meeqqat atuarfii immikkullu atuarfiit ilinniarfiusut naatitsivissa-nik agguarneqarlutik, soorlu radisit, salaatit, persille, dildit, musat eertallu naatinneqarsinnaallutik.

Massakkul meeqqat, angajoqqaat, perorsaasut ilinniartisisullu naatitsivissat issoraleriarlugit qanoq iliuuseqaannassallutik. Pilersaarummilli ingerlatsisuusoq Laasi Kristiansen ikiuutissalluni suli piareersimavoq.

- Sapaatip akunnerisa kingullit ingerlanerini suliffeqarfiit ilaanni naatitsivissanik issortalersuinerit malinnaaffigisimavakka. Takusinnaavaralu pilersaarummi arlallit ikiorneqarnissaminnik pisariaqartitsisut. Soorunalimi ikiuukkusuppunga.

Nalunngilara, suliffeqarfiit ilaasa aggustimi grillerisitsiniarlutik pilersaarutigigaat, tamatumanilu nammineq naatitavut akugalugit kalaaliminertuutissalluta. Tassalu atuilluartuuneq!