Tusagassiutitigut nalunaarut - Sisimiuni igalaamerngit ingerlavigineqarsinnaapput

Ukiup ataatsip missaa qaangiuppoq, Sisimiuni innuttaasut igalaaminerit qillertuusallu igitassaatiminnik containerinut assigiinngitsunut marlunnut immikkoortillugit igitsisinnaanngormata.
Eqqagassanik annerusumik immikkoortitsisalernerup kingunera, illoqarfiup aqquserngisa asfalterneqarnerisigut takuneqarsinnaanngorpoq. Maannakkummi asfalterinermi, igalaamerngit ilaatigut atorneqartalerput.
23. august 2013

Ukiup ataatsip missaa qaangiuppoq, Sisimiuni innuttaasut igalaaminerit qillertuusallu igitassaatiminnik containerinut assigiinngitsunut marlunnut immikkoortillugit igitsisinnaanngormata.
Eqqagassanik annerusumik immikkoortitsisalernerup kingunera, illoqarfiup aqquserngisa asfalterneqarnerisigut takuneqarsinnaanngorpoq. Maannakkummi asfalterinermi, igalaamerngit ilaatigut atorneqartalerput.

Ukiup ataatsip ingerlanerani Sisimiuni innuttaasut igalaaminernik 60m3-it missaannik annertutigisumik igitsisimapput. Igalaamerngit sequtsiararneqarput, asfaltimilu ujaraaqqanut sioqqanullu 7 m3-it missaannik taarsiutitut atorneqarlutik.

Manna tikillugu Sisimiuni Nikkorsuit-ni aqquserngup ilaa, asfaltimik nutaamik asfalterneqarpoq. Sapaatip akunnerini tulliuttuni, illoqarfiup qiterpasissortaani Pisiffik-up eqqaa asfaltimik igalaaminernik akulimmik aamma asfalterneqassaaq.

Igalaaminernik qillertuusanillu immikkoortiterisalerneq maani illoqarfimmi eqqaavissuarmut aamma malunniuteqarpoq. Nalinginnaasumik ikuallaasarnermut sanilliullugu, ukiup kingulleq ukiumut 60 m3-it missaannik annertutiginerusumik ikuallaasimassallutik naatsorsuutigaat – tassa imaappoq, siornatigut igalaaminerit immikkoortiterneqarneq ajorallarnerani ikuallaavimmi ikuallaasarnerup annertoqataanik ikuallaasimapput.

Teknikkimut Avatangiisinullu ataatsimiititaliap siulittaasuata Hans Frederik Olsen-ip Sisimiuni innuttaasut nersualaarpai.
- Tamatumanimi inuttaasut tamakkiisumik patsisaalluinnarput. Taakkuupput igalaaminernik qillertuusanillu immikkoortiterillutik, containerinut qorsunnut sungaartunullu igitsisartut. Avatangiisitsinnut taama amerlatigisut akisussaaffimmik tigusisimammata, eqqagassanillu immikkoortiterisarnerup pitsanngorsaavigineqarnissaanut pimoorussillutik peqataanerat nuannerpoq, taama oqarpoq.

Asfaltikkut igalaaminernik akoqartukkut ingerlaartilluni qaartoornissaq ernumagineqartariaqanngilaq.
-Igalaamerngit ujaraaqqatut ilusinitsillugit 0-1 cm-inngorlugit sequtserneqartarput. 1970-ikkunnili USA-mi igalaaminernik asfaltimut akoorisarput, taama ingerlatsinermi pisortaq Jacob S. Lundgaard oqarpoq.

Kangerlussuarmi immikkoortiterivinnik containereqalissaaq 
Ukiap ingerlanerani Kangerlussuarmi innuttaasut aamma igalaaminernik qillertuusanillu immikkoortiterisinnaanngussapput. Containerit sungaartut marluk, qorsuillu marluk, nunaqarfiup iluani qiterpasissortani marlunni septembarimi inissinneqassapput.

Sisimiunituulli Kangerlussuarmi innuttaasut immikkoortiterivinnik containerini atuilluarumaarnissaanik Hans Frederik Olsen neriuuteqarpoq. 
- Kangerlussuarmi containerit aamma atorluarneqassasut soorunalimi neriuutigaara. Eqqakkanik immikkoortiterisarneq avatangiisinut, taamaalillunilu aamma innuttaasunut, qanoq sunniuteqarsinnaanersoq takussaasumik assersuutissaqarpugut. Taamaattumik upperilluinnarpara, Kangerlussuarmi eqqakkanik immikkoortiterisinnaanngornissaq innuttaasunit tigulluarneqassasoq, taama oqarpoq.

Siunissami Maniitsumi igalaaminernik qillertuusanillu immikkoortiterisinnaanngornissaq pilersaarutigineqarpoq.

Annertunerusumik paasissutissat 
Ingerlatsinermi pisortaq Jacob S. Lundgaard, oqarasuaat angallattakkamut 52 57 80-imut imaluunniit Teknikkimut Avatangiisinullu ataatsimiititaliap siulittaasua Hans Frederik Olsen, oqarasuaat 24 43 70 attavigiuk.