Tusagassiutitigut nalunaarut: Ilinniartunut inissiat tamatta akisussaaffigaagut

Ilinniartitaanermut Naalakkersuisuusimasup Palle Christiansen-ip, maannakkullu Ilinniartitaanermut Naalakkersuisup Nick Nielsen-ip ilinniartunut inissiat pillugit assortuunnerat, Qeqqata Kommuniani Borgmester Hermann Berthelsen-ip tupigusuutigaa. Ilinniartunut inissiat Namminersorlutik Oqartussat Kommunillu akisussaaffigigaat puigorsimagunarpaat.
20. august 2013

Kommunip ilinniartunut inissiaatai

Sisimiuni ukiuni kingullerni 15-ini illoqarfimmiunut ilinniartunut inissianik 70-inik sanaartorpugut. Sanaartornermik Ilinniarfik aamma ARTEK annertuumik ineriartornerini, Ilinniartunut Namminersorlutik Oqartussat inissiaataaniissinnaatitaanngitsunut ilinniartunut inissialiortitsinissaput pisariaqarsorivissimavarput. Pilersaarut tamanna Sisimiut Kommunerisimasaani tamarmiulluta isumaqatigisimavarput, soorlu aamma Palle Christiansen-i Sisimiuni kommunalbestyrelsimut ilaasortaanermini isumaqataasimasoq, taama Hermann Berthelsen ilisimatitsivoq.

”Palle Nuummut maanna nuussimariarami immaqa puigorsimavaa, Nuummilu ilinniartunut inissiassanik Namminersorlutik Oqartussat ujartuiffigalugit. Innuttaasut amerlassusii eqqarsaatigalugit Sisimiunut sanilliussissagaanni, Nuummi kommunip ilinniartunut inissiaatai 200-juussagaluarput. Nuummi kommunip ilinniartunut inissiaatai qassiuppat?”, taama Hermann Berthelsen aperivoq.

Namminersorlutik Oqartussat ilinniartunut inissiaatai

Palle Christiansen, 2012-imi Ilinniartitaanermut Naalakkersuisuunermi nalaani, Namminersorlutik Oqartussat pigisassaannik Sisimiuni ilinniartunut inissianik marlunnik katillugit 100-t missaanniittunik initaqartussanik sanaartortoqarnissaanik pilersaaruteqarmat, Hermann Berthelsen-ip nuannaarutigaa. Aatsitassanut Ilinniarfittaami ilinniariartunummi, ARTEK-imilu issittumi ingeniørinngornianut amerliartuinnartunut inissiat pisariaqarvitsinneqarput. Ajoraluartumik innissiap aappaannaa kisimi akissaqartinneqarpoq, aappaata sanaartorneqarnissaa taamaatinneqarpoq.

”Ilinniartitaanermut Naalakkersuisutaap pilersaarutit taakku immaqa misissortariaqaraluarpai, Aningaasanummi 2014-imut inatsisissatut siunnersuutip suliarineqarnerani taakku nikisinneqarsimanngitsutut isikkoqarput. Sisimiuni ilinniartunut aappaatut inissiassaagaluamut aningaasat atugassaagaluit, Nuummi ilinniartunut inissialiornissamut nuunneqarsimapput. Aatsitassarsiornerup ineriartortinneqarnissaa nunatsinni anguniagarigipput, Ilinniartitaanermut Naalakkersuisup Nick Nielsen-ip puigorsimanerlugu?”, taama Hermann Berthelsen aperivoq.

Ataatsimut aaqqiineq

Aatsitassarsiornerup iluani, entreprenøritullu atorfiit nunanit allaneersunit inuttalersorneqassanngippata, Sisimiuni aatsitassarsiornermi ilinniarfimmi ilinniartunut ingeniørinngornianullu ilinniartunut inissiaqarnissaa nunatsinni atorfissaqartipparput. Qilanaaraara Ilinniartitaanermut Naalakkersuisup Nick Nielsen-ip aamma Aatsitassaqarnermut Naalakkersuisup Jens-Erik Kirkegaard-ip oqaloqatigiinnermikkut, Sisimiuni ilinniartunut inissialiortiternissamut 2014-imut Aningaasanut Inatsisitigut aningaasanik immikkoortitsisoqartariaqarnera pisariaqartoq paasissagaat.

”Ilinniartunut inissiat illoqarfimmi pisariaqartinneqarfimminni sanaartorneqarnissaannut Namminersorlutik Oqartussat aningaasaatiminnik atuigunik, matumanilu ilutigalugu kommunip kommunimi najugaqarlutik ilinniartut ineqartinneqarnissaannik, qitornaasalu meeqqerivinni inissaqartinnissaannik qulakkeerinnikkunik ajunnginnerussanngikkaluarnerluni. Tamanna nunatsinni ilinniartunut pitsaanerusumik atugassaqartitsinerullunilu siunissamut nunatsinnut ajunnginnerussanngikkaluarnerluni”?, taama Hermann Berthelsen aperivoq.