Tusagassiutitigut nalunaarut - iPads-imik suliniut naammassineqarsinnaalerpoq

Kommunini marluusuni illoqarfinni nunaqarfinnilu tamani attaveqaammik WiFi-mik pilersuisussatut Qarasaasialerisut Inu:it A/S isumaqatigiissusioqatigalugu, ullumi Qeqqata Kommunia Kommune Kujalleq-llu atsiorput. Taamaalilluni iPads-inik suliniutip tunngavittut aaqqissuussaanera piareerpoq.
11. september 2013

Kommunini marluusuni illoqarfinni nunaqarfinnilu tamani attaveqaammik WiFi-mik pilersuisussatut Qarasaasialerisut Inu:it A/S isumaqatigiissusioqatigalugu, ullumi Qeqqata Kommunia Kommune Kujalleq-llu atsiorput. Taamaalilluni iPads-inik suliniutip tunngavittut aaqqissuussaanera piareerpoq.

Kommunini marluusuni iPads-imik suliniutip ukiup affaata tulliata iluani atuutsilersinnaaneranut isumaqatigiissutitigut periarfissanngorpoq. Juullertinnagu Qeqqata Kommuniani, ukiullu nutaap aallartinnerani Kommune Kujalleq-mi. Taamaalilluni kommunini marluusuni atuartut ilinniartitsisullu tamarmik, atuarfimmi atuarfiullu avataani WiFi aqqutigalugu internetsimut attaveqarsinnaassallutik, iPads-inik tunineqassapput.

Atuarfimmi atuarfiullu avataani internetsimut attaveqarsinnaaneq pillugu teknikkikkut aaqqiissussat arlaliusimapput. Illoqarfiit nunaqarfiillu ataasiakkaat iluini killeqanngitsumik attaveqarsinnaanermut Inu:it-ip aaqqiissutaa pitsaanerpaasutut iluaqutissaqarnerusutullu, borgmesterinit marluusunit Hermann Berthelsenimit Jørgen Wæver Johansenimillu isumaqataaffigineqarpoq. Taamaalilluni atuartut akunnerminni attaveqaqatigiissinnaanissaat kiisalu atuarfiup angerlarsimaffiullu akunnerminni atuartitsinissamut pilersaarutinik ilinniagassanillu il.il. attaveqaqatigiissinnaanissaat periarfissanngussalluni.

Tamatuma saniatigut Inu:it A/S-imi pisortaanerup Martin Gjødvad-ip paasissutissiissutigaa, WiFi-mik aaqqiineq assigiinngitsunik atortulerluni internetsikkut attaveqaatinik annertuunik toqqorsisoqarsinnaassasoq, taamaaliornikkut atuarfimmut ataatsimut nittartagaq imaluunniit programmi ataasiaannarlugu aaneqarsinnaassalluni, naak iPads-init tamanit internetsikkut tiguneqaraluartoq. iPads-it 3.000-it assigiinngitsunik programmillit nutarsarneqarnissaannut annertuumik pingaaruteqarpoq.

Namminersorlutik Oqartusanit iPads-imik suliniummik tapersersuinermikkut Atta-mik attaveqaatip atorsinnaaneranut periarfissiinera, Qeqqata Kommuniani borgmester Hermann Berthelsen-ip nuannaarutigaa. Tamatuma saniatigut atuarfinni soorlu flatrate-qalersillugit Attat-mik attaveqaatip nutarsarneqarnissaanut Namminersorlutik oqartussat aningaasaleeqqissimanerat, Hermann Berthelsen-ip nersualaarpaa.

Kommune Kujalleq-mi borgmester Jørgen Wæver Johansenip oqaatigaa, meeqqat atuarfiini atuartuutitsinnut iluaqutaasussamik pisortat suleqatigiinnerat pitsaalluinnartoq. iPads-inik pisinissamut neqerooruteqartitsinissaq maannakkut ingerlanneqalissaaq, borgmesterillu naatsorsuutigaa nunatsinnit nunaniillu allanit piniarfigineqartartunit annertuumik soqutiginnittoqassasoq, tassami nunatsinni iPads-inik 3.000-inik amerlanerusunik ullut tamaasa pisisoqarneq ajorpoq, taama Jørgen Wæver Johansen oqarpoq.

iPads-imik suliniut VILLUMFOND-imit 17 mio. koruuninik aningaasaliisoqarneratigut piviusunngortinneqarsinnaasimavoq. Kalaallit kommuniisa qarasaasiaqarnermut ineriartornermut peqataalernissaat, VILLUMFOND-imit aningaasaateqarfiup siunnersuisuata Jens-Jørgen Pedersen-ip qilanaaraa. Ukiuni kingullerni qarasaasiatigut ineriartorneq sukkasoorujussuarmik ingerlasimavoq, Kalaallit Nunaannullu qarasaasiat annertuumik piukkunnartuullutik. Ilinniarneq atuarfeqarfinni kisimi ingerlanneqarneq ajorpoq, nunarsuaq tamakkerlugu paasissutissanik pissarsinissamut attaveqaqatigiinnissamullu atuartunik aamma periarfissiivoq, Jens-Jørgen Pedersen oqarpoq.