Itilleq nersornaaserneqarpoq

Namminersorlutik oqartussat nersornaasiuttagaa Avatangiisinik Pinngortitamillu Mianerinninneq pingajuat kingullerlu ullumikkut tusarliunneqarpoq.

Toqqagaasuuppullu Itillimi innuttaasut.
13. december 2013

Namminersorlutik oqartussat nersornaasiuttagaa Avatangiisinik Pinngortitamillu Mianerinninneq pingajuat kingullerlu ullumikkut tusarliunneqarpoq. Toqqagaasuuppullu Itillimi innuttaasut.

Namminersorlutik oqartussat imatut oqaasertaqartillugu allagaqarput:

”Itillermiut suleqatigiillutik ataatsimoorussillutillu nunaqarfitsik saligaatsuutippaat. Nunaqarfimmi maangaannaq eqqaaqqusaanngillat meeqqallu inuusuttullu eqqaaqqunagit oqaanneqartarlutik. Eqqagassat igalaamerngit qillertuusallu immikkoortiterneqartarput eqqagassallu Sisimiunukaanneqartarlutik. Eqqaavissuarmiittut eqqakkat immikkoortiterneqarput, nunaqarfik salinneqarluni ataavartumillu saligaatsuutitsineq ingerlanneqarluni, tamannalu Itillermiut namminneq aallartitaraat aaqqissuussaralugulu. Meeqqat inuusuttullu peqaataatinneqarnermikkut oqaanneqarnermikkullu nunaqarfimmik saligatsuutitsinermut akuutinneqarput taamaasillutillu Itillermiut nunaqqatiminnut maligassiuipput nersorneqartariaqarlutillu.”

Meeqqerivimmi "Nuunu"-mi ningiuusoq Kathrine Dahl nuannaarutigaa taamatut nunaqqatigiit nersornaaserneqarmata. 2005-imili ningiutut sulilerami pingaartitaraa meeqqat mikineriniit asuli nunamut eqqaasassannginnerinik oqaaqqissaarneqarnissaat. Tamannalu peqqutaaqataalluni meeqqat nunaqarfitsik kusanartippaat. Nersornaaserneqarnertik atorluarlugu suli saligaatsuutitsineq annertunerulernissaa kusanarninngornisaalu ingerlakkusuppaat.

Inuit, suliffeqarfiit kattuffiilluunniit tamatsinnik pinngortitamik avatangiisimillu mianerinninnissatsinnik ilisimaarinnilersitsisut imaluunniit Kalaallit Nunaanni suliniuteqarnermikkut avatangiisitsinnik pitsanngorsaataasumik iliuuseqarsimasut nersorniarlugit nersornaat tunniunneqartarpoq.Unnugu tallimanngorneq decembarip 13-iani nal. 19:00 Itillip Meeqqeriviani "Nuunu"-mi nersornaasiineq ingerlanneqassaaq.

 

Qeqqata Kommuniata tulluusimaarutigalugu Itillermiut tamarmik qamannga pisumik pilluaqqujumavai.