Tusagassiutitigut nalunaarut: Nuna tamakkerlugu oqaloqatigiinneq ataqatigiinnerlu

Borgmesterinit Jørgen Wæver Johansen-imit, Hermann Berthelsen-imit aamma Ole Dorph-imit allataq

Ukiuni kingullerni sisamani annertuumik eqititerisoqarpoq, tamannalu patsisaaqataalluni nunatsinni oqimaaqatigiinngitsumik naleqqutinngitsumillu kinguneqartitseqataalluni. Inuiaqatigiit annersaanni avissaartuunnermik nikallunganermillu kinguneqartitsivoq, pissutsillu taakku naleqqutinngitsut iluarsiiffigineqartariaqarput.
22. januar 2014

Borgmesterinit Jørgen Wæver Johansen-imit, Hermann Berthelsen-imit aamma Ole Dorph-imit allataq

Ukiuni kingullerni sisamani annertuumik eqititerisoqarpoq, tamannalu patsisaaqataalluni nunatsinni oqimaaqatigiinngitsumik naleqqutinngitsumillu kinguneqartitseqataalluni. Inuiaqatigiit annersaanni avissaartuunnermik nikallunganermillu kinguneqartitsivoq, pissutsillu taakku naleqqutinngitsut iluarsiiffigineqartariaqarput.

Qujanartumik Naalakkersuisut nutaat aserorsaataasumik oqimaaqatigiinngitsumik naleqqutinngitsumillu ingerlatsinermut eqqummaarillutillu ajornartorsiutip iluarsiivigineqarnissaanut suliniuteqarmata. Ataatsimoortumik tapiissutinik pitsaanerulaartumik agguataarineq, Namminersorlutik Oqartussallu sanaartornissamut aningaasaliissutinik assigiinnerusumik agguaassinissat 2013-imi ukiakkut ataatsimiinnermi takuarput. Taamaakkaluartoq Nunatsinni naleqquttumik aningaasatigut agguaassisarnissamut anguniagassaq suli ungaseqaaq.

Ukiuni kingullerni sisamani aningaasatigut pingaarnertut inissisimaneq eqqarsaatigalugu oqimaaqatigiinngitsumik naleqqutinngitsumillu ingerlatsineq kisimi ajorseriaannanngilaq. Oqimaaqatigiinngitsumik naleqqutinngitsumillu ingerlatsineq itinerusumiippoq. Naalakkersuisuusimasut ataatsimiititaliarsuarnik, isumalioqatigiissitanik, ataatsimiititalianik siulersuisunillu arlalippassuarnik pilersitsinikuupput. Pilersinneqartuni taakkunani tamani ilaasortat amerlanersaat illoqarfiit pingaarnersaanni najugaqarput.

Nunap immikkoortortaani tamani pissutsinut ilisimaarinnigatik, pingaarnertut illoqarfigisaminni pissutsinut ilisimaarinninnerat ajornartorsiutaavoq. Tamattami ilisimasagut aallaavigisarpagut. Illoqarfimmit ataasiinnarmeersunit ilaasortaliinikkut arlaatigut suleqatigiissitaliornermi, aaqqiissutissat eqqartorneqarnerini illoqarfigisaq kisimi eqqummaariffigineqalertarpoq.

Assartuussineq pillugu Isumalioqatigiissitaq Danmarkimit Nuummiillu kisimi ilaasortaqartillugu, Danmark-ip Nuullu akornanni assartuineq pingaarnertut Assartuussineq pillugu Isumalioqatigiissitami eqqartorneqartassaaq. Suleqatigiissitat assigiinngitsut Danmarkimit Nuummiillu kisimi ilaasortallit Issittumi Sakkutooqarfiup, pineqaatissinneqarsimasunut isertitsiviup matoqqasup imaluunniit killeqarfimmi uumasunik nakkutilliinerup inissinneqarnissaa eqqartussappassuk, soorunalimi eqqartukkat Nuummi inissinneqarnissaat siunnersuutigineqassaaq. Eqqugaasunut suleqatigiissitat, isumalioqatigiissitat ataatsimiititaliallu Nuummiunit ilaasortaqarneruppata, taava illoqarfiit pingaarnersaanni eqqugaasut pingaarnerutinneqarlutik aaqqiissutissanik ujartuisoqassaaq.

Ilinniarfiit siulersuisui illoqarfiit pingaarnersaanit ilaasortaqarnerugunik, ilinniarfiit illoqarfiit pingaarnersaannut nuunneqarnissaat siulersuisut siunnersuutigissavaat, tamanna ilaatigut Oqalutsinngornianut Ilinniarfik eqqarsaatigalugu pinikuusoq. Illoqarfiup pingaarnersaanit sinerissamut nuutsitsisoqarnissaannik allat siunnersuuteqartillugit, siulersuisut taakku illoqarfiit pingaarnersaannit nuutsitsisoqarnissaannut akerliussapput. Kingullertut assersuutigisamut tunngatillugu Niuernermik Ilinniarfiup Nuummit Qaqortumut nuutsinneqarnissaa pillugu oqallinnermi taamatorluinnaq pisoqarpoq.

Isumalioqatigiissitanik, ataatsimiititalianik, ataatsimiititaliarsuarnik siulersuisunillu Namminersorlutik Oqartussat pilersitsinerini nunap immikkoortortanik/kommuninit sinniisuutitaqartarnissaat pingaartipparput. Nunap immikkoortortanimi/kommuninimi tamani innuttaasut piginnaasaqarlutik pitsaasunik isummersuisinnaapput. Qitiusumik allaffeqarfik illoqarfimmi ataasiinnarmi inissisimatillugu Isumalioqatigiissitat, ataatsimiititaliat, ataatsimiititaliarsuit siulersuisullu Nunatta sineriaanit annerusumik sinniisoqarnissaat pingaaruteqarpoq, taamaalilluni oqallinnerni Nunatta sineriaanit tamanit isummersuisoqarluni, oqallinnerit Nunamut tamarmut tunngassuteqassallutik.

Ataatsimiinnissat arlaqartut qitiusumik allafeqarfiup angerlarsimaffigisaa qimallugu illoqarfinni allani ingerlanneqartartuugaluarpata, tamanna aamma oqaloqatigiinnermut ataqatigiinnissamullu iluaqutaassasoq qularutissaanngilaq. Taamaalilluni neriunartumik qitiusumik allaffeqarfiup angerlarsimaffigisaata avataani pissutsinut, qitiusumik allaffeqarfik annerusumik ilisimaarinninnerulissagaluarpoq.

Taamaalilluni Naalakkersuisut nutaamik ingerlatsiniarnerminnik ingerlatsiinnarlutik, suliassanut pingaaruteqartunut suligasuartussanik toqqartuisarnerminni oqimaaqatigiinngitsumik naleqqutinngitsumillu ingerlatsiunnaarnissaat qilanaaraarput. Assigiimmik agguaassisalernikkut, Nunatsinni pitsaanerusumik oqaloqatigiittoqartalerlunilu ataqatigiinnerulertoqassaaq.