Tusagassiutitigut nalunaarut: Kalaallit Nunaannut iluaqutissat - naammi Maniitsup eqqaani aluminiumik aatsitsivissaq?

Soqutigeqalugu Qeqqata Kommuniani atuarparput ”KALAALLIT NUNAANNUT ILUAQUTISSAT” inuiaqatigiinnut iluaqutaasussamik nunatta pisuussutai pillugit nalunaarusiaq qanittukkut saqqummersoq professor Minik Rosing siuttoralugu. Ataatsimiititaliaq ilisimatuunik immikkut ilisimasallinnik inuttaqartoq aatsitassat pillugit ataatsimut isiginnittumik qulaajaasimavoq soorlu qanoq ililluni Kalaallit Nunaata pisuussutai atorluarneqarsinnaasut.
4. februar 2014

Borgmester Hermann Berthelsen aamma aatsitassanut attaveqarnermullu siulittaasoq Gedion Lyberth

Soqutigeqalugu Qeqqata Kommuniani atuarparput ”KALAALLIT NUNAANNUT ILUAQUTISSAT” inuiaqatigiinnut iluaqutaasussamik nunatta pisuussutai pillugit nalunaarusiaq qanittukkut saqqummersoq professor Minik Rosing siuttoralugu. Ataatsimiititaliaq ilisimatuunik immikkut ilisimasallinnik inuttaqartoq aatsitassat pillugit ataatsimut isiginnittumik qulaajaasimavoq soorlu qanoq ililluni Kalaallit Nunaata pisuussutai atorluarneqarsinnaasut.

Ataatsimiititaliap ajunngivissumik allaaserai Islandimi aluminiumik aatsitsiviit soorlu assersuutigalugu Fjardalip aluminiumik aatsitsivia, kommuunitta suleqatigisimasaa. Ataatsimiititaliap ilisimalersimavaa, aatsitsiviup tunisassiulernerani nunaqavissut 80 %-iisa missaaniittut suliffeqalersimasut, ilimagisamiit marloriaammik amerlanerusut. Islandimi misilittakkat aamma takutippaat, aatsitsiviit pilersinneqarsimanerat nuannaarutigineqartut kiisalu aningaasarsiornermut nunap immikkoortortaanut iluaqutaasut. Nunap immikkoortortaani inunnik sulisoqarnera kiisalu allanik suliffissanik pilersitsinerat neriuutigineqartumiit annertunerusimapput. Ilinniagaqarsimanngitsut inuusuttullu suliffinnik ataavartunik imaluunniit utaqqiisaasumik taakkunani sulisut kiisalu pikkorissaanerit sivikitsut tunngavigalugit ilinniartinneqartartut amerlasimapput.

Qeqqata Kommuniata ataatsimiititaliap nalunaarusiaa nersualaarusuppaat taamaakkaluartoq kommunip maqaasivaa, ataatsimiititaliap Maniitsup eqqaani aatsitsiviliariniarneqartoq annertunerusumik sammisimanngimmagu, misilittakkammi nunani eqqatsinniittuni ajunngilluinnartuummata. Suliassat angisuut pillugit nalunaarusiaq tunngavigalugu Naalakkersuisut 2012-imi tusarniaanerannut atatillugu kommunip aatsitsiviliornissamut pilersaarutip iluaqutissartai annertuut aatsitassanut piiaanermut sanilliullugit taakkartorsimavai ukuusut:

  1. aluminiumik aatsitsivissap tunngavigaa erngup nukinga ataavartumik pilersuisinnaasoq – aatsitassanilli piiaanermi pisuussut nunguttussaasoq atorneqarluni
  2. aluminiumik aatsitsiviit suliffissanik ataavartunik pilersitsisarmata – aatsitassanilli qalluinerit killilimmik ingerlanneqartarlutik
  3. aluminiumik aatsitsivissaq illoqarfiup qanittuaniimmat – aatsitassanilli piiaaviit amerlanerpaartaat illoqarfinniit avinngarusimasuniittarlutik

Qeqqata Kommunia isumaqarluinnarpoq, ataatsimiititaliap Naalakkersuisullu Maniitsup eqqaani aatsitsivissamut pilersaarut annertunerujussuarmik sammisariaqaraluaraat iluaqutissartai ataatsimiititaliap kommunillu eqqartugaat tunngavigalugit taamaasillutimmi kommunimut Kalaallit Nunaannullu iluaqutaassagaluarmata.

Annertunerusumik paasisaqarusukkuit

Attavigiuk aluminiumskoordinator Peter Søren Olsen, mobil nr. 58 55 10.