Qeqqata Kommuniani atuilluartuunissamut suliniutinut aningaasaliissutit agguaanneqarneri

Qeqqata Kommuniani atuilluartuunissamut aningaasaliissutinik kingumut agguaassisoqaqqippoq.
Aningaasaliissutinit agguaassassanit tunineqarnissaminnik massakkut qinnuteqartut amerlasimaqaat. Atuilluartuunissamut suliniutinut aningaasaliissutinit agguaassassanit, pilersaarutinut soqutiginarluinnartunut tunineqarnissaminnik qinnuteqartut katillugit 17-iupput, pilersaarutinullu qulingiluanut katillugit 100.100 koruunit agguaanneqarlutik. Taakkunannga pilersaarutit arfineq-pingasut tamarmik immikkut 11.375 koruuninik, pilersaarullu ataaseq 9.100 koruuninik aningaasaliiffigineqarput.
12. juni 2014

Pilersaarutinit soqutiginarluinnartunit ilaatigut Peqatigiiffik Neriusaaq pujoorivimmik, aalisakkanut panertitsivimmik kiisalu Maniitsup eqqaani utoqqaat illuarassaannik pilersitsinissaminnik kissaateqartoq aningaasaliiffigineqarpoq. Tamatuma saniatigut Agnetha Geisler aamma Øjvind Scwedler, sikkilinik assartuutinik assersuutigalugu innuttaasut pisiaminnik assartuinissaannut akeqanngitsumik attartortitserusullutik pilersaaruteqarnerinut aningaasaliiffigineqarput. Urban Greenland(Sisimiuni sikkilertarfimmi ammalortumik sikkilertarfiliornikut) aaqqissugaanik, skaterneq pillugu Sisimiuni niviarsiaqqanut aaqqissuussinissamut aamma aningaasaliiffigineqarput. Kingullertut minnerunngitsumillu Lea aamma Vittus Poulsen, Atammimmi silami timigissaatissanik pisinissaannut aningaasaliiffigineqarput.

”Maannakkut qinnuteqartitsinermi pilersaarutit soqutiginaateqarluartut arlaqaqimmata, pilersaarutit piviusunngortinneqarnissaat periarfissikkumallugu siammasissumik tapersiiniarluta aalajangerpugut” taama Borgmester Hermann Berthelsen oqarpoq.

Sisamassaa atuilluartuunissamut aningaasaliissutit agguaanneqarput. 2013-imi oktobarimi agguaassinermi katillugit 55.000 koruunit agguaanneqarput.

Tullissaani atuilluartuunissamut aningaasaliissutissanik qinnuteqarnissamut killiliussaq tassaavoq 1.oktobari 2014.

Innuttaasut, peqatigiiffiit kattuffiillu kajumissutsiminnik suliaqarnermikkut inuiaqatigiit atuilluartuulernerunissaannut taperseerusuttut tapersernissai, atuilluartuunissamut aningaasaliilluni agguaassisarnerup siunertaraa. Qeqqata Kommuniata 2020-mi issittumi inuiaqatigiit atuilluartuunissaannik takorluuineranut, atuilluartuunissamut aningaasaliissutit ilaapput.