Tusagassiutitigut nalunaarut: Sisimiuni Piareersarfik pillugu kiffartuussinissamik isumaqatigiissut

Sisimiuni Piareersarfimmi suliassarpaaluit juulip aallaqqaataanit Qeqqata Akademi tigusisussanngorlugu, Qeqqata Akademi aamma Qeqqata Kommunia sapaatip akunnerani matumani atsioqatigiipput. Oqartussaasut suliassaat Qeqqata Kommuniata suli isumagisarissavai.
26. juni 2014

Sisimiuni Piareersarfimmi suliassarpaaluit juulip aallaqqaataanit Qeqqata Akademi tigusisussanngorlugu, Qeqqata Akademi aamma Qeqqata Kommunia sapaatip akunnerani matumani atsioqatigiipput. Oqartussaasut suliassaat Qeqqata Kommuniata suli isumagisarissavai.

Kiffartuussinermi isumaqatigiissutip kingunerisaanik, Sisimiuni Piareersarfimmi sulisut amerlanersaat Qeqqata Kommunianit Qeqqata Akademiimut nuussapput. Massakkut atorfeqartut atorfinitsitaanerini atugassarititaasut allannguuteqaratik Qeqqata Akademimi atorfeqassapput.

Qeqqata Akademi piginnaasanik ineriartortitsinissamik kiisalu pisortat namminersortullu akornanni qaninnerusumik suleqatigiinnissamik pingaartitsisuulluni suliffeqarfiuvoq nutaaq. Palle Lennert, Jimmy Hymøller, Lars Møller Sørensen aamma Jan Richard Qeqqata Akademiimik ingerlatsisuupput. Sisimiuni Piareersarfimmi suliassanik 2014-imi juulip aallaqqaataani tigusinermi saniatigut Sisimiuni pikkorissarnissanik ilinniarnissanillu assigiinngitsunik neqerooruteqarpoq.

Kommunip suliassaataanik namminersortunngorsaanissamik suliariumannittussarsiuussinissamillu Qeqqata Kommuniata siunniussaanut, Qeqqata Akademi aamma Qeqqata Kommuniata akornanni kiffartuussinissamik isumaqatigiissut ingerlatitseqqippoq. Ukiuni kingullerni Qeqqata Kommuniata suliassarpaaluit namminersortunngorsarlugillu suliariumannittussarsiuunnikuuai. Kalaallit Nunaanni suliariumannittussarsiuunneqakkajuttartut soorlu ilaatigut eqqiaaneq, eqqagassalerineq, kantinamik ingerlatsineq, bussinik ingerlatsineq il.il. suliariumannittussarsiuunneqarnikuupput. Tamatuma saniatigut sisorartarfik, inuusuttut ornittagaat, saviminernik eqqagassalerineq, takornarialerinerlu kiisalu maanna Piareersarfik suliariumannittussarsiuunneqarnikuupput.